Шаҳрисабзда 30 миллион сўмлик кўмир маҳсулотларини талон-торож қилган кўмир омбори мудирига жиноят иши қўзғатилди. Бу ҳақда «Дарё»га ҳуқуқ-тартибот органларидаги манбаси хабар берди.
ДХХ Қашқадарё вилояти бошқармаси, ҳуқуқ-тартибот органлари билан ҳамкорликда «Ўзбеккўмир» АЖ «Қашқадарё кўмир етказувчи» филиалига қарашли Шаҳрисабз кўмир омборида тезкор тадбир ўтказилган.
Тадбир давомида Шаҳрисабз кўмир омбори мудири Т.Ҳ. бюджет маблағлари ҳисобидан ижтимоий соҳа объектларига етказиб берилиши учун Ангрен шаҳридан келтирилган кўмир маҳсулотининг салкам 80 тоннасини ҳеч қандай ҳужжатсиз Шаҳрисабз шаҳрида жойлашган «Ланд зайтун» хусусий корхонаси омборхонасига етказиб бергани аниқланган. Шу йўл билан 23 миллион сўмдан ортиқ кўмир маҳсулоти талон-торож қилинган.
Бундан ташқари, текширув давомида «Ўзкўмир» АЖ «Қашқадарё кўмир етказувчи» филиалига қарашли кўмир омборидан ижтимоий соҳа объектлари учун 2020 йилнинг сентябрь ойи давомида етказиб берилган кўмир маҳсулотларининг тарқатилиши ва ҳақиқатда мавжудлиги ўрганилганда Шаҳрисабз кўмир омбори мудири Т.Ҳ.нинг жавобгарлигида 1286,6 тонна кўмир қолдиғи мавжуд бўлиб, ушбу ҳисоботдаги қолдиқ билан ўлчовдаги қолдиқ таққосланганда 24,1 тонна, жами 30 миллион 984 минг сўмлик кўмир маҳсулоти талон-торож қилингани аниқланган.
Мазкур ҳолат юзасидан Т.Ҳ.га нисбатан Жиноят кодексининг тегишли моддалари билан жиноят иши қўзғатилган.
Изоҳ (0)