Qashqadaryoda davlatga qariyb 7 mlrd so‘m zarar keltirgan elektr ta’minoti korxonasi mansabdorlariga jinoyat ishi qo‘zg‘atildi

Qashqadaryoda elektr energiyasidan noqonuniy foydalanib, davlatga 7 mlrd so‘m zarar keltirgan shaxslarga jinoyat ishi qo‘zg‘atildi. Bu haqda “Daryo”ga huquq-tartibot organlaridagi manbasi xabar berdi.

Ma’lum bo‘lishicha, “Bistimplex” MChJ hamda Kitob tumani elektr tarmoqlari korxonasi o‘rtasida 2019-yil 1-avgust kuni energiya ta’minoti bo‘yicha shartnoma tuzilgan.Unda texnik shtat olingan quvvatni kamaytirib 1 kVt soat elektr energiyasi uchun 450 so‘m ko‘rsatilgan. “Bistimplex” MChJga tegishli 3 dona transformatordan faqatgina 1 donasi shartnomaga kiritilib, 2 tasi shartnoma va “Elektrhisob” dasturiga kiritilmagan.

Bu bilan Vazirlar Mahkamasining 2018-yil 12-yanvardagi qarori bilan tasdiqlangan “Elektr energiyasidan foydalanish qoidalari” talabiga zid harakatlar amalga oshirilgan.

Kitob tuman ETK xodimlari “Bistimplex” MChJ mansabdor shaxslari bilan jinoiy til biriktirib, texnik shart talablariga rioya qilmasdan, xizmat farmoyishisiz 3 dona transformatorni elektr tarmog‘iga ulab bergan, natijada, davlat manfaatlariga 6 milliard  948,4 million so‘m zarar yetkazilgan.

Holat yuzasidan Kitob tuman ETK mansabdor shaxslariga nisbatan Jinoyat kodeksining 205-moddasi 2-qismi “a” bandi (juda ko‘p miqdorda zarar yetkazgan holda hokimiyat yoki mansab vakolatini suiiste’mol qilish) bilan jinoyat ishi qo‘zg‘atilgan. “Bistimplex” MChJ mansabdor shaxslariga nisbatan esa Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) 4-qismi bilan jinoyat ishi qo‘zg‘atilgan.