“Men o‘lishga tayyor edim”. Britaniyaning eng og‘ir vaznli fuqarosi kasalxonaga kran yordamida olib ketildi

Angliyada yashovchi 30 yoshli erkak muntazam ravishda shokolad, chips, gamburger va gazlangan ichimliklar iste’mol qilgan, natijada uning vazni 300 kilogrammni tashkil etgan. Oxir-oqibat uning davolanishi uchun kasalxonaga kran yordamida olib ketildi.

Jeyson Xolton o‘zi haqida shunday deydi: “Men bir dyuym ham harakatlana olmaydigan darajada ovqatlanar edim. Shuningdek, yordam chaqirmasdan yashash meni bir muddat xursand qildi. Men o‘lishga tayyor edim, yuragim qachon taslim bo‘lar ekan, deb kutardim. Hayotda men uchun hech narsa qolmaganini his qilgandim”.

Jeyson uyda 52 yashar onasi bilan birga yashaydi. Uning onasi favqulodda vaziyatlar xizmatiga qo‘ng‘iroq qilib, ko‘p qavatli uyning ikkinchi qavatidan o‘g‘lini chiqarib olish uchun ulkan kran kerakligini so‘ragan.

Qutqaruvchilar uni tashqariga chiqarish uchun  yotoqxona derazasini yechib oldi. 30 dan ortiq o‘t o‘chiruvchilar Jeyson yashaydigan uy atrofida saf tortdi. Qurilish muhandislari Jeyson yiqilsa, shift qulab tushishidan qo‘rqib, pastki qavatga tirgaklar o‘rnatdi.

“Bu ajablanarli edi, chunki olti yil davomida birinchi marta toza havoda edim. Kran tasmalari og‘riq bermasligi uchun menga kodein berildi, shunda ham toza havo va tanam uzra esayotgan shamol yodimda qoldi.

Ko‘tarilayotganimda omon qolmayman, degan xavotir bor edi. Kislorod darajasi bilan bog‘liq muammolar paydo bo‘ldi, ammo qutqaruvchilarga tezroq harakat qilishlarini aytdim, aks holda uyda o‘lishim mumkin edi”, − deydi erkak.

Og‘ir vaznli deb hisoblangan Jeyson shifoxonaga maxsus tez yordam mashinasida olib borilgan. Uning qorin, son va oyoq qismidagi limfedemalar ishdan chiqib, ular tanada shishlarni keltirib chiqargan.

Bemorning onasi Leysa o‘g‘li haqida shunday deydi: “Men uning uchun xavotirdaman, uni yo‘qotishdan qo‘rqaman. Shifokorlar uni 5 yil ham yashay olmasligini aytdi. U to‘satdan yurak xurujiga uchrashi mumkin ekan”.

Jeyson 2015-yilda Duvrda yashovchi 33 yoshli Karl Tompson vafotidan keyin Buyuk Britaniyadagi eng semiz odamga aylandi. Jeyson hech qachon biror joyda ishlamagan, u nafaqalar hisobiga yashaydi.

U haftasiga 258 dollar nafaqa va shaxs mustaqilligi dasturidan 147 dollar mablag‘ oladi. Uning onasiga ham oyiga soliq imtiyozlaridan 261 dollar miqdorda pul to‘lanadi. Jeysonning aytishicha, uning ortiqcha vazni tufayli ish topishning iloji yo‘q.