Англияда яшовчи 30 ёшли эркак мунтазам равишда шоколад, чипс, гамбургер ва газланган ичимликлар истеъмол қилган, натижада унинг вазни 300 килограммни ташкил этган. Охир-оқибат унинг даволаниши учун касалхонага кран ёрдамида олиб кетилди.
Жейсон Холтон ўзи ҳақида шундай дейди: «Мен бир дюйм ҳам ҳаракатлана олмайдиган даражада овқатланар эдим. Шунингдек, ёрдам чақирмасдан яшаш мени бир муддат хурсанд қилди. Мен ўлишга тайёр эдим, юрагим қачон таслим бўлар экан, деб кутардим. Ҳаётда мен учун ҳеч нарса қолмаганини ҳис қилгандим».
Жейсон уйда 52 яшар онаси билан бирга яшайди. Унинг онаси фавқулодда вазиятлар хизматига қўнғироқ қилиб, кўп қаватли уйнинг иккинчи қаватидан ўғлини чиқариб олиш учун улкан кран кераклигини сўраган.
Қутқарувчилар уни ташқарига чиқариш учун ётоқхона деразасини ечиб олди. 30 дан ортиқ ўт ўчирувчилар Жейсон яшайдиган уй атрофида саф тортди. Қурилиш муҳандислари Жейсон йиқилса, шифт қулаб тушишидан қўрқиб, пастки қаватга тиргаклар ўрнатди.
«Бу ажабланарли эди, чунки олти йил давомида биринчи марта тоза ҳавода эдим. Кран тасмалари оғриқ бермаслиги учун менга кодеин берилди, шунда ҳам тоза ҳаво ва танам узра эсаётган шамол ёдимда қолди.
Кўтарилаётганимда омон қолмайман, деган хавотир бор эди. Кислород даражаси билан боғлиқ муаммолар пайдо бўлди, аммо қутқарувчиларга тезроқ ҳаракат қилишларини айтдим, акс ҳолда уйда ўлишим мумкин эди», − дейди эркак.
Оғир вазнли деб ҳисобланган Жейсон шифохонага махсус тез ёрдам машинасида олиб борилган. Унинг қорин, сон ва оёқ қисмидаги лимфедемалар ишдан чиқиб, улар танада шишларни келтириб чиқарган.
Беморнинг онаси Лейса ўғли ҳақида шундай дейди: «Мен унинг учун хавотирдаман, уни йўқотишдан қўрқаман. Шифокорлар уни 5 йил ҳам яшай олмаслигини айтди. У тўсатдан юрак хуружига учраши мумкин экан».
Жейсон 2015 йилда Дуврда яшовчи 33 ёшли Карл Томпсон вафотидан кейин Буюк Британиядаги энг семиз одамга айланди. Жейсон ҳеч қачон бирор жойда ишламаган, у нафақалар ҳисобига яшайди.
У ҳафтасига 258 доллар нафақа ва шахс мустақиллиги дастуридан 147 доллар маблағ олади. Унинг онасига ҳам ойига солиқ имтиёзларидан 261 доллар миқдорда пул тўланади. Жейсоннинг айтишича, унинг ортиқча вазни туфайли иш топишнинг иложи йўқ.
Изоҳ (0)