Rossiyaning Ufa shahrida istiqomat qiluvchi Salavat Asxatov ismli erkakka homiladorlik tashxisi qo‘yildi va unga ginekologga borish tavsiya qilindi. Erkak mazkur holatni e’tiborsizlik va o‘z ishiga mas’uliyatsiz yondashish deya hisoblagan bo‘lsa, amaldorlar buni “texnik xato” demoqda. Ufalik erkak ushbu qiziqarli voqea haqida o‘zining “VKontakte”dagi sahifasiga yozib qoldirgan.
“Kasallik tarixiga ko‘ra, men homiladorman. Ufa shahridagi 21-sonli kasalxonaga yotganimga besh kun bo‘ldi”, — deydi erkak.
Uning ta’kidlashicha, Salavat o‘tkir respirator virusli infeksiyasiga chalingan va kasallik buning oqibatida o‘tkir bronxit, so‘ng ikki tomonlama pansinusitga aylanib ketgan. Erkakni shifoxonaga yotqizishgan.
“Kasallik tariximni ko‘rdim. Eng birinchisi — tishimni davolatmaganman. Ikkinchisi — ambulatoriya davolanganman. Uchinchisi esa men homiladorman, buning ustiga ginekolog konsultatsiyasi ham kerak ekan. Buni qanday atash mumkin — e’tiborsizlik, o‘z ishiga mas’uliyatsiz yondashish?”, — deb yozadi rossiyalik fuqaro.
Mazkur holat bo‘yicha tibbiyot muassasasida xizmat tekshiruvi o‘tkazilgan. Mahalliy amaldorlarning ma’lum qilishicha, bemorning hujjatlarini rasmiylashtirish vaqtida texnik xatolik sodir bo‘lgan.
“Homiladorlik bu yaxshi. Aytishlaricha, qaysidir tashkilot dunyoda birinchi bo‘lib farzand dunyoga keltirgan erkakka million dollar to‘lashga tayyor ekan. Shu sababli eson-omon qutulib olishingizni tilayman”, “Tabriklayman! O‘g‘ilmi yoki qiz?”, “Mamlakatda demografiyani qandaydir usul bilan ko‘tarish kerak-ku axir”, “Xotining endi seni uyga kirgizmaydi”, — deya “homilador” erkak yozgan postning ostiga izohlar qoldirilmoqda.
Izoh (0)