O‘zbekistonda umumta’lim maktablarning milliy reytingi e’lon qilindi

Ta’lim sifatini nazorat qilish davlat inspeksiyasi umumta’lim maktablarining milliy reytingini e’lon qildi. Unga ko‘ra, Buxoro, Namangan va Xorazm viloyati maktablari eng yuqori ko‘rsatkichga erishgan, Sirdaryo, Toshkent va Surxondaryo viloyati maktablari esa eng past natija ko‘rsatgan.

Qayd etilishicha, reyting tuzish uchun 2019-yil 3-oktabrdan 18-dekabrgacha barcha tuman va shaharlarning 992 ta umumta’lim muassasalarida, 10 mingga yaqin maktabning 10 foizida nazorat ishlari va ijtimoiy so‘rovnomalar o‘tkazilgan.

Mahalliy va xalqaro tajribalar, mutaxassislarning fikr-mulohazalari asosida maktablar reytingini tuzish uchun 4 ta ko‘rsatkich asosiy mezon sifatida qabul qilingan:

• bitiruvchi o‘quvchilarning (11-sinf) umumta’lim fanlari bo‘yicha ta’limiy tayyorgarlik darajasi va sifat ko‘rsatkichi (35 ball);
• 9-sinf o‘quvchilarining bilim darajasi (25 ball);
• oliy va birinchi toifali o‘qituvchilar ulushi (20 ball);
• umumta’lim muassasasining o‘quvchilari va pedagog jamoasi o‘rtasida o‘tkaziladigan so‘rovnoma natijalari (20 ball).

“Bu indikatorlar asosida 2020-yil 1-iyul holatiga maktablarning reyting natijalari tayyorlandi. Hududlar reytingida eng yuqori o‘rinlarni Buxoro, Namangan va Xorazm viloyatlari egallagan bo‘lsa, quyi o‘rinlarda Sirdaryo, Toshkent va Surxondaryo viloyatlari qayd etildi”, — deb yozmoqda Ta’lim inspeksiyasi.

Reytingda 11-sinf bitiruvchilarining o‘qishga kirish ko‘rsatkichlari bo‘yicha Toshkent shahri (10,2 foiz), Navoiy (10,2 foiz), Qoraqalpog‘iston Respublikasi (10,4 foiz), Farg‘ona (10,7 foiz) va Buxoro (16,5 foiz) viloyatlari peshqadam bo‘lgan.

“Bu yil 10 foiz maktab bo‘yicha reyting tuzilgan bo‘lsa, kelasi yillarda optik tolali internet tarmog‘iga ulangan maktablar soni oshib borishi hisobiga zamonaviy axborot kommunikatsiyalaridan unumli foydalangan holda mazkur reytingga 100 foiz maktablarni qamrab olish rejalashtirilgan”, – deyiladi Ta’lim inspeksiyasi xabarida.