“Daryo”ning huquq-tartibot organlaridagi manbalari Sirdaryo viloyatida kuzatilgan bir nechta firibgarlik holatlari haqida xabar qildi.
Sirdaryo viloyati uy-joy kommunal xizmat ko‘rsatish boshqarmasi, “Ta’mirlash-tiklash xizmati” DUKda ishlagan 34 yoshli fuqaro Mirzaobod tumanida o‘zining nomiga tashkil qilingan anorchilikka ixtisoslashtirilgan fermer xo‘jaligining 2,7 gektar yer maydonini tuman hokimligidagi tanishlari orqali Guliston tumanida yashovchi tanishi nomiga rasmiylashtirib berish evaziga 66 million so‘m olgan vaqtida DXX Sirdaryo viloyati boshqarmasi hamda Bosh prokuratura huzuridagi departamentning hududiy boshqarmasi xodimlari tomonidan jinoyat ustida qo‘lga olingan.
Yangiyer shahridagi firmada ish yurituvchi vazifasida ishlagan 1979-yilda tug‘ilgan boshqa bir fuqaro esa hokimiyat, bank va kadastr tashkilotlarida ishlovchi tanishlari orqali Yangiyer shahrida yashovchi fuqaroga imtiyozli ravishda namunali uy olib berishini va xususiy bog‘cha qurish uchun 10 sotix yer maydoni ajratishda amaliy yordam ko‘rsatishni va’da qilib, buning uchun 2500 AQSh dollari olgan vaqtida ashyoviy dalillar bilan ushlangan.
Shuningdek, “O‘zbekiston temir yo‘llari” AJga qarashli “O‘zvagonta’mir” AJ “Xovos vagonlarni ta’mirlash deposi” ishchisi temiryo‘l sohasida yuqori lavozimda ishlovchi tanishlari orqali fuqaroni Toshkent temiryo‘l vokzalining qo‘riqlash otryadiga ishga kiritib qo‘yish evaziga 2 000 AQSh dollari olgan vaqtida DXX Sirdaryo viloyati boshqarmasi hamda prokuratura xodimlari tomonidan qo‘lga olingan. Holatlar yuzasidan jinoyat ishlari qo‘zg‘atilib, tergov harakatlari olib borilmoqda.
Avval Qashqadaryoda metall zavodiga ishga kiritib qo‘yish uchun 80 ming AQSh dollari so‘ragan shaxs qo‘lga olingani, Buxoroda koronavirusga chalingan fuqaroga kompensatsiya puli to‘g‘rilab berish evaziga 200 dollar talab qilgan fuqaro ushlangani haqida xabarlar berilgan.
Izoh (0)