Сирдарё вилоятида ер олиб бериш, имтиёзли равишда уй олиб бериш ва ишга жойлаштириш бўйича фирибгарлик ҳолатлари кузатилди

«Дарё»нинг ҳуқуқ-тартибот органларидаги манбалари Сирдарё вилоятида кузатилган бир нечта фирибгарлик ҳолатлари ҳақида хабар қилди.

Сирдарё вилояти уй-жой коммунал хизмат кўрсатиш бошқармаси, «Таъмирлаш-тиклаш хизмати» ДУКда ишлаган 34 ёшли фуқаро Мирзаобод туманида ўзининг номига ташкил қилинган анорчиликка ихтисослаштирилган фермер хўжалигининг 2,7 гектар ер майдонини туман ҳокимлигидаги танишлари орқали Гулистон туманида яшовчи таниши номига расмийлаштириб бериш эвазига 66 миллион сўм олган вақтида ДХХ Сирдарё вилояти бошқармаси ҳамда Бош прокуратура ҳузуридаги департаментнинг ҳудудий бошқармаси ходимлари томонидан жиноят устида қўлга олинган.

Янгиер шаҳридаги фирмада иш юритувчи вазифасида ишлаган 1979 йилда туғилган бошқа бир фуқаро эса ҳокимият, банк ва кадастр ташкилотларида ишловчи танишлари орқали Янгиер шаҳрида яшовчи фуқарога имтиёзли равишда намунали уй олиб беришини ва хусусий боғча қуриш учун 10 сотих ер майдони ажратишда амалий ёрдам кўрсатишни ваъда қилиб, бунинг учун 2500 АҚШ доллари олган вақтида ашёвий далиллар билан ушланган.

Шунингдек, «Ўзбекистон темир йўллари» АЖга қарашли «Ўзвагонтаъмир» АЖ «Ховос вагонларни таъмирлаш депоси» ишчиси темир йўл соҳасида юқори лавозимда ишловчи танишлари орқали фуқарони Тошкент темир йўл вокзалининг қўриқлаш отрядига ишга киритиб қўйиш эвазига 2 000 АҚШ доллари олган вақтида ДХХ Сирдарё вилояти бошқармаси ҳамда прокуратура ходимлари томонидан қўлга олинган. Ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.

Аввал Қашқадарёда металл заводига ишга киритиб қўйиш учун 80 минг АҚШ доллари сўраган шахс қўлга олингани, Бухорода коронавирусга чалинган фуқарога компенсация пули тўғрилаб бериш эвазига 200 доллар талаб қилган фуқаро ушлангани ҳақида хабарлар берилган.