World Crypto Capital kompaniyasi rahbari Aleksey Meng O‘zbekistonda 2 mingdan ortiq fuqaroning jami 1,7 million dollarini qo‘lga kiritib, mamlakatdan chiqib ketgani haqida xabar berilgandi. Mazkur shaxs va uning sheriklaridan jabr ko‘rgan fuqarolar 18-oktabr kuni Bosh prokuraturaning fuqarolar qabulxonasi oldida yig‘ilib, namoyish o‘tkazdi. Bu haqda Bosh prokuratura ma’lum qildi.

Foto: UzNews

Xabar berilishicha, mazkur fuqarolar Aleksey Meng va A.Molotyagin boshchiligidagi International Consulting Group platformasiga sarmoya kiritgan va firibgarlik harakatlari oqibatida moddiy zarar ko‘rgan. Shu sababli ular namoyishni tashkil qilgan. Ushbu tadbirda ishtirok etgan fuqarolardan jami 33 ta murojaat qabul qilingan.

Bosh prokuratura xabariga ko‘ra, Aleksey Meng va boshqalarga nisbatan O‘zbekiston Respublikasi Jinoyat kodeksining 168-moddasi 4-qismi “a” bandi (uyushgan guruh tomonidan yoki uning manfaatlarini ko‘zlab sodir etilgan firibgarlik) bilan qo‘zg‘atilgan jinoyat ishi hozirda Toshkent shahar IIBB huzuridagi Tergov boshqarmasi ish yurituvida.

“Fuqarolar tomonidan berilgan murojaatlar jinoyat ishiga qo‘shib o‘z vaqtida va obyektiv ko‘rilishi Bosh prokuratura nazoratiga olingan”, — deyiladi xabarda.

Eslatib o‘tamiz, 29 yoshli O‘zbekiston fuqarosi Aleksey Meng World Crypto Capital MChJga rahbarlik qilgan va www.icgexpert.com internet portali orqali firibgarlik sxemasi asosida fuqarolardan pul mablag‘lari jalb qilish bilan shug‘ullangan. Unga nisbatan xalqaro qidiruv e’lon qilingan.

Mazkur portal orqali firibgarlik yo‘li bilan 2 mingdan ortiq o‘zbekistonlikdan 1,7 million dollar jalb qilingan. Jalb qilingan pul mablag‘larini o‘zlashtirish uchun Aleksey Meng va uning sheriklari 2019-yilning dekabr oyida kompaniya faoliyatini to‘xtatgan va O‘zbekistondan chiqib ketgan.