O‘zbekistonda 2 mingdan ortiq fuqarolarning 1,7 mln dollarini qo‘lga kiritgan kripto-firibgar mamlakatdan chiqib ketgani ma’lum bo‘ldi

World Crypto Capital kompaniyasi rahbari Aleksey Meng O‘zbekistonda 2 mingdan ortiq fuqaroning jami 1,7 million dollarini qo‘lga kiritib, mamlakatdan chiqib ketgan. Bu haqda huquqni muhofaza qiluvchi idoralarga tayanib, UzNews xabar berdi.

Ma’lum qilinishicha, 29 yoshli O‘zbekiston fuqarosi Aleksey Meng World Crypto Capital MChJga rahbarlik qilgan va www.icgexpert.com internet portali orqali firibgarlik sxemasi asosida fuqarolardan pul mablag‘lari jalb qilish bilan shug‘ullangan. Unga nisbatan xalqaro qidiruv e’lon qilingan.

Mazkur portal orqali firibgarlik yo‘li bilan 2 mingdan ortiq o‘zbekistonlikdan 1,7 million dollar jalb qilingan.

Jalb qilingan pul mablag‘larini o‘zlashtirish uchun Aleksey Meng va uning sheriklari 2019-yilning dekabr oyida kompaniya faoliyatini to‘xtatgan va O‘zbekistondan chiqib ketgan.

Kompaniya yopilganidan keyin Aleksey Meng Moskvada ta’tilda ekanligini aytib, mijozlarni ishontirishda davom etgan. Biroz vaqtdan keyin elektron platformaning o‘zi ham g‘oyib bo‘lgan. O‘sha paytda kompaniya tomonidan berilgan shartnomasi bo‘lgan kishilar mazkur shartnomalar 100 ming so‘mlik konsalting xizmati uchun tuzilganini aniqlashgan.

Kompaniya 2018-yil oxirida o‘z xizmatlarini ommabop OAVlarida faol reklama qilishni boshlagan. U o‘zini O‘zbekistonda raqamli iqtisodiyotning rivojlanishiga, blokcheyn haqida ma’lumotlarning mavjudligi va aholining daromadlarini oshirishga ko‘maklashuvchi tashkilot sifatida ko‘rsatgan. Keyinchalik kompaniya internet, shuningdek, uning xizmatlaridan foydalanganlar orqali mashhur bo‘lishni boshlagan.

Kompaniya loyihasiga pul tikuvchilar bilan to‘g‘ridan to‘g‘ri maslahatlashishda kompaniya xodimlari ularga qonuniy to‘lov vositasi bo‘lgan kriptovalyuta sotib olishlarini tushuntirgan. Shu bilan birga, har bir omonatchida elektron resursda shaxsiy kabinet mavjud bo‘lib, unda omonat miqdorini ham, mablag‘larning kelib tushishini ham kuzatish mumkin edi. Ayrim ehtiyotkor fuqarolar tomonidan o‘tkazib beriladigan summa nega shartnomada ko‘rsatilmaganligi haqida so‘ralganda, xodimlar barcha summalar foydalanuvchining shaxsiy kabinetida ko‘rsatilishiga ishontirgan.

Kompaniyaning menejerlari va maslahatchilari qurboniga aylangan fuqarolarning so‘zlariga ko‘ra, dastlabki to‘lov 1000 dollar bo‘lgan, bir hafta ichida 500 dollar mijozlarga qaytarilgan. Omonatlardan dividendlar olinganligi sababli kompaniya boshlang‘ich mablag‘lar miqdorini oshirishni talab qilgan.

Bugungi kunga kelib, O‘zbekistonda sodir etilgan moliyaviy firibgarliklar sababli jinoiy javobgarlikdan qochish uchun Aleksey Meng Facebook ijtimoiy tarmog‘ida Alex Meng profili orqali mamlakatda amalga oshirilayotgan islohotlar to‘g‘risida provokatsion kampaniya o‘tkazmoqda.

Aleksey Meng va uning sheriklariga nisbatan O‘zbekistonning vakolatli organlari Jinoyat kodeksining 168-moddasi 4-qismining “a”, “v” bandlari (Uyushgan guruh tomonidan yoki uning manfaatlarini ko‘zlab juda ko‘p miqdorda sodir etilgan firibgarlik), 188-1-moddasi 3-qismining “a” va “v” bandlari (Uyushgan guruh tomonidan yoki uning manfaatlarini ko‘zlab juda ko‘p miqdorda pul mablag‘larini va (yoki) boshqa mol-mulkni jalb etishga doir noqonuniy faoliyat) va 190-modda 2-qismining “a”, “v” bandlari (Bir guruh shaxslar tomonidan oldindan til biriktirib juda ko‘p miqyosda litsenziyasiz faoliyat yuritish) bilan jinoyat ishi qo‘zg‘atilgan.