Toshkent shahar hokimligida 14-oktabr kuni Senatning Yoshlar, madaniyat va sport masalalari qo‘mitasi a’zolari, poytaxt deputatlari va boshqa mas’ullar ishtirokida majlis bo‘lib o‘tdi. Unda Mehribonlik uylari bitiruvchilari masalasida so‘z bordi, deb xabar bermoqda “Kun.uz”.
Ma’lum bo‘lishicha, so‘nggi 2 yildan buyon Mehribonlik uylari tarbiyalanuvchilariga 11-sinfni tugatganda beriladigan BHMning 100 baravari miqdoridagi nafaqa to‘lanmay kelinmoqda.
Toshkent shahar Moliya bosh boshqarmasining tushuntirishicha, bunga sabab – tegishli nizomga 2013-yilda o‘zgartirish kiritilganidir.
Qay etilishicha, 2002-yilda qabul qilingan 1187-sonli nizomga ko‘ra, to‘liq davlat ta’minotidagi yetim bolalarga ular barcha turdagi umumta’lim maktablarini bitirib chiqayotganda va ishga joylashayotganda kiyim-bosh, poyabzal va anjomlar sotib olish uchun EKOIHning 100 baravarigacha miqdorda nafaqa beriladi.
Moliyachilarning izohlashicha, 11-sinflar bekor qilinib, kollej va litseylar joriy qilingani sababli 2013-yilda “11-sinfni bitirib” degan so‘zlar nizomdan chiqarib tashlangan. 2018-yildan esa O‘zbekistonda 11-yillik umumiy ta’limga qaytildi.
“Agar nizomga tegishli o‘zgartirish kiritilsa, Mehribonlik uyi bitiruvchilariga pul to‘lab beriladi. Bu haqda Xalq ta’limi vazirligiga ham bizning boshqarmamiz tomonidan xat yo‘llangan. Vazirlar Mahkamasiga ham ushbu taklif kiritilgan. Nizomga o‘zgartirish kiritilsa, Mehribonlik uyidagilar ishga kirgandan keyin ham pullari to‘lab beriladi”, – dedi Toshkent shahar Moliya bosh boshqarmasi vakili.
Toshkent shahar Xalq ta’limi bosh boshqarmasi boshlig‘i Avaz Mamajonovning ma’lum qilishicha, 2015-yildan boshlab poytaxtdagi Mehribonlik uylarini bitirganlar jami 357 nafarni tashkil etadi. Shundan 75 nafari – 2020-yilda bitirganlardir.
“Ularning 10 nafari oliy ta’lim muassasalariga qabul qilindi. Bitiruvchilarning atigi 13 nafari ish bilan ta’minlangan. Ishsiz yurganlar esa 30 nafarni tashkil etmoqda”, – dedi poytaxt XTBB boshlig‘i.
Mavzuga doir:
- Oliy Majlis Senati yetim bolalarning jamiyatga ijtimoiy moslashuvi yuzasidan bosh vazir nomiga xat yo‘llaydi
- O‘zbekistonda budjet tashkilotlari xodimlariga rag‘batlantirish pullarini to‘lash 2021-yilgacha to‘xtatildi
- “Onalar yo‘lda o‘lib, bolalarni davlat boqqanidan ko‘ra, o‘sha yetimlarga ketadigan pulni yo‘lni to‘g‘rilashga sarflang”. Boysunliklar ko‘prik muammosi haqida
Izoh (0)