Janubiy Koreya hukumati O‘zbekistondan kirib keluvchi fuqarolar uchun karantin choralarini kuchaytirdi. Shuningdek, ushbu choralarga rioya qilishda faol hamkorlikka chaqirdi. Bu haqda O‘zbekistonning Janubiy Koreyadagi elchixonasi xabar berdi.
Foto: AP Photo
Unga ko‘ra, endi O‘zbekiston fuqarolariga mamlakatga kirishda quyidagi talablar qo‘yiladi:
- tana harorati me’yori 37,3 daraja etib belgilandi (avval 37,5 edi);
- kasallik alomatlari bor fuqarolarning hamrohi ham aeroportdagi maxsus karantin hududida tibbiy ko‘rikdan o‘tadi;
- kasallik alomatlari yo‘q fuqarolar vaqtinchalik karantinni o‘tash joyida tibbiy ko‘rikdan o‘tadi.
Qayd etilishicha, tekshiruvdan so‘ng koronavirusga PZR-testi natijasi musbat bo‘lsa, fuqaro kasalxona yoki davolash muassasasiga jo‘natiladi. Natija manfiy bo‘lsa, qisqa muddatli vizaga ega fuqarolar maxsus karantin hududiga, uzoq muddatli vizaga ega fuqarolar (turar joyining karantin sharoitiga muvofiqligi tekshirilgandan so‘ng) karantinni o‘tash uchun turar joylariga jo‘natiladi.
Janubiy Koreyaning O‘zbekistondagi elchixonasi 24-sentabrdan boshlab koronavirusga PZR-testi ma’lumotini tasdiqlash uchun konsullik tekshiruvi tizimini joriy qilgandi. Bunga o‘zbekistonliklarning Janubiy Koreyaga COVID-19’ga chalinmaganlik haqida soxta ma’lumotnoma bilan kelayotgani sabab bo‘lgan. Shu sababli koronavirusga test topshirishni faqat elchixona tomonidan tasdiqlangan laboratoriyada amalga oshirish mumkin.
