“Futbol xuddi ayolga o‘xshaydi. Chunki u juda o‘zgaruvchan”. Futbol tarixidagi eng mashhur iqtiboslar

Futbolchilar barcha davrlarda ham maydonda ham uning tashqarisida o‘ta faol bo‘lgan. Ularning gaplari esa matbuot uchun yaxshigina mavzu bo‘lib, o‘quvchilar tomonidan gohida iliq, gohida esa salbiy qabul qilinadi. Hatto qaysidir futbolchining ikki og‘iz gapi uning butun boshli faoliyatini ostin-usun qilib yuborgan vaziyatlar ham kuzatilgan. Biroq charm to‘p ustalari ham (har zamonda) quyidagilar kabi takrorlanmas va shedevr gaplarni aytib turadi.

— Agar jarima maydonchasi ichida to‘pni nima qilishni bilmasang, unda shunchaki gol ur. Yana nima qilish mumkinligini esa o‘yindan keyin muhokama qilamiz.

— Bo‘lajak rafiqamning otasi mendan nima bilan shug‘ullanishimni so‘radi. Men esa unga futbolchi ekanimni aytdim. Uning bundan jahli chiqib, kasbing nima deb so‘radi. Unga bu kasb ekanini aytdim. Ammo uning yuz ifodasini ko‘rib, g‘isht tera olishimni ham qo‘shib qo‘ygandim, birdaniga xursand bo‘lib ketdi.

Bob Peysli

— Italiya futboli – qo‘rqinchli o‘yin. Ikki kishi hujum qiladi, qolganlar himoyalanadi, yosh o‘yinchilar esa zaxirada o‘tiradi.

Arrigo Sakki

— O‘yinlar unutiladi, natija esa qoladi.

Valeriy Lobanovskiy

— Agar u yerda kimningdir qo‘li bo‘lsa, bu Xudoniki edi.

— Onam men eng zo‘ri deb hisoblaydi. Men esa hech qachon onam bilan bahslashmayman.

Diyego Maradona

— Futbol o‘ynayotganingizda hamma narsani esdan chiqarasiz. U sizning vujudingizni egallab oladi. Demak, bu shunchaki o‘yin emas.

Devid Bekhem

— Menga otilgan toshlardan bemalol haykal yasasa bo‘ladi.

— Agar ular sizni yoqtirmasa, demak siz bilan hammasi joyida. Mabodo ular sizni yomon ko‘rishsa, demak siz eng zo‘risiz.

Joze Mourinyo

— Har qanday kamchilik ustunlik bo‘lib xizmat qilishi mumkin.

— Futbol – oddiy o‘yin, ammo oddiy o‘ynash oson emas.

Yoxan Kroyff

— Shunchaki yugurish – hayvonlarga xos. Futbol o‘ynash uchun bizga aql va to‘p kerak.

Lui van Gal

— Jamoada eng yaxshi o‘yinchilarning borligi, bu hali eng yaxshi jamoa ekanligini anglatmaydi.

Marchello Lippi

— Men kelishgan yigit emasman. Lekin men qilayotgan harakatlar o‘ziga rom etadi.

— Shunday o‘ynaginki: murabbiying minnatdor bo‘lsin, rafiqang sevsin, do‘stlaring qadrlasin, raqiblaring qo‘rqsin, ota-onang esa g‘ururlansin.

Ronaldinyo

— Men futbolni aql bilan emas, balki yurakdan o‘ynayman.

Tyerri Anri

— Men “tiki-taka”ni yomon ko‘raman. U haqida boshqa eshitishni ham xohlamayman. “Tiki-taka” – pas berish uchun pas beradi. Men futbolchilarimni bu axlat bilan shug‘ullanishga majbur qilmayman.

Xosep Gvardiola

— Agar sen biz yutqazganimizda qo‘llab-quvvatlamasang, g‘alaba qozonganimizda ham xursand bo‘lmay qo‘ya qol.

— Futbol – hayot-mamot masalasi emas, balki undan ham muhimroqdir

Bill Shenkli

— Futbolda faqat bitta qonun bor: g‘alaba futbolchilarga, mag‘lubiyat esa murabbiyga tegishli.

Vuyadin Boshkov

— Futbol – oddiy o‘yin. Unda 22 kishi 90 daqiqa to‘p orqasidan yuguradi, yakunda esa nemislar g‘alaba qozonadi.

Gari Lineker

— Agar Gvardiola mendan “Kamp Nou”ning tepasidan pasga sakrashni so‘rasa, men o‘ylab ko‘rib, shunday deyman: “Menimcha bu shunga arzisa kerak”.

Dani Alves

— Devid Bekhem chap oyoqda o‘ynashni bilmaydi, bosh bilan esa juda yomon o‘ynaydi. Bundan tashqari, umuman “podkat” qilmaydi va kam gol uradi. Qolgan jihatlarda esa unga teng keladigani yo‘q.

Jorj Best

— Futbolchi bo‘lishning eng yomon qismi. Bu intervyu berish.

Lionel Messi

— Men hech Angliyadagi hayotga moslasha olmadim. Sababi bu yerda har kuni yomg‘ir yog‘adi.

Patris Evra

— Futbol xuddi ayolga o‘xshaydi. Chunki u juda o‘zgaruvchan.

Silvio Berluskoni

— Xotinni, avtomashinani, hatto dinni ham almashtirish mumkin, biroq sevimli jamoani almashtirib bo‘lmaydi.

Erik Kantona

— Har doim ham kuchlilar g‘alaba qozonavermaydi, lekin futbolning go‘zalligi ham aynan shunda.

Raul

— Men hech qachon hasad qiladiganlarni tushunmagan va birovga hasad ham qilmaganman. Hammasi o‘z qo‘lingizda. Hayot mehnatga yarasha mukofotlaydi.

Krishtianu Ronaldu

— Xato qilmaslik uchun tajriba to‘plash lozim. Tajriba to‘plash uchun esa xato qilish kerak.

Zinedin Zidan