“Avto ideal xizmati” MChJ mansabdor shaxslari o‘z mijozlarining 8 milliard so‘mdan ortiq pul mablag‘larini o‘z ehtiyojlari yo‘lida sarflab yuborgan. Jabrlanuvchilarga yetkazilgan zararni qoplash maqsadida boshqa mijozlarga yetkazib berilgan 24,6 milliard so‘mlik 219 ta avtotransport vositalariga taqiqlar qo‘yilgan va xatlangan. Bu haqda IIV huzuridagi Tergov departamentiga asoslanib “Kun.uz” xabar qildi.
Tergov harakatlari davomida “Avto ideal xizmati” MChJ mansabdor shaxslari U.Nuriddinov, Q.Rixsiyev hamda boshqa shaxslar 2019-yil 11-oktabrdan 2020-yil 29-fevralga qadar avtomashina turiga qarab mijozlardan 10 million so‘mdan 80 million so‘mgacha oldindan to‘lovlarni qabul qilib, yillik 5 foiz to‘lov evaziga 1 yildan 5 yilgacha bo‘lgan muddatga avtomashina yetkazib berishni va’da qilgan. Ular jami 1831 nafar fuqarolar bilan umumiy qiymati 148,4 milliard so‘mlik transport vositasini yetkazib berish haqida shartnomalar rasmiylashtirgan. Shartnomalar doirasida jami 34,7 milliard so‘m pul mablag‘larini jamiyat hisob raqamiga qabul qilingan. Olingan pul mablag‘laridan 24,6 milliard so‘mini transport vositalari uchun to‘lov sifatida o‘tkazgan bo‘lsa, 8,1 milliard so‘m pul mablag‘larini o‘z manfaatlari yo‘lida sarflab yuborgan.
MChJ bilan mijozlar o‘rtasida jami 1831 dona shartnoma rasmiylashtirilib, fuqarolarning ishonchiga kirish maqsadida 219 nafar fuqarolarga transport vositasi yetkazib berilgan. Jamiyat mansabdor shaxslari tomonidan pul mablag‘lari o‘zlashtirilishi oqibatida 1612 nafar mijoz oldidagi majburiyatlar bajarilmagan.
Jinoyat ishi bo‘yicha jabrlanuvchilarga yetkazilgan zararni qoplash maqsadida boshqa mijozlarga yetkazib berilgan 24,6 milliard so‘mlik 219 ta avtotransport vositalariga taqiqlar qo‘yilgan va xatlangan. Tergov davomida yetkazilgan zararni qoplash maqsadida 602 million so‘m pul mablag‘lari xatlanib, depozit hisob raqamiga saqlash uchun topshirilgan.
“2020-yil 5-oktabr kuni U.Nuriddinov, Q.Rixsiyev hamda S.Usmonovalarga nisbatan Jinoyat kodeksining 168-moddasi 4-qismi “a,v” bandlari (firibgarlik) bilan ayblov e’lon qilinib, dastlabki tergov harakatlari tamomlangani taraflarga e’lon qilingan.
Hozirda jinoyat ishini prokuratura organi orqali tegishli sudlovga oshirish choralari ko‘rilmoqda”, deyiladi IIV huzuridagi Tergov departamenti.
Mavzuga doir:
- “Spark’ning puliga Malibu va’da qilgan” Angrendagi “Avto ideal xizmati” 1283 kishini chuv tushirdi
- Angrendagi “Avto ideal xizmati” fuqarolarni 30 mlrd so‘mga chuv tushirgani ma’lum bo‘ldi
- UzAutoMotors’ga ishga kiritib qo‘yaman deb odamlarni 42 ming dollarga “uxlatgan” firibgarlarga jinoyat ishi qo‘zg‘atildi
Izoh (0)