Belarus prezidenti Aleksandr Lukashenko 10-oktabr kuni Davlat xavfsizlik qo‘mitasi tergov hibsxonasida Muvofiqlashtiruvchi kengash va muxolifatning qo‘shma shtabining hibsga olingan vakillari bilan uchrashdi, deb xabar bermoqda “Pul pervogo” Telegram kanaliga tayanib “Interfaks”.
U yerda prezident qamoqdagi muxolifat vakillar bilan to‘rt yarim soat davomida suhbatlashdi. Prezidentning maqsadi barchaning fikrlarini tinglash ekani ta’kidlangan.
Suhbat mazmuni ishtirokchilar tomonidan sir tutilgan. Vaziyatdan xabardor “Pul pervogo” Telegram kanali Lukashenkoning faqat “Ko‘chada konstitutsiyani yozolmaysiz” degan so‘zlarini keltirgan.
Ma’lum qilinishicha, uchrashuvda, bo‘lib o‘tgan saylovlarda prezidentlikka da’vogar Viktor Babariko va uning o‘g‘li Eduard, Konstitutsiyaviy sud prezidiumining a’zosi Liliya Vlasova, Babarikoning shtab-kvartirasi koordinatori Yuriy Voskresenskiy ishtirok etgan.
Eslatib o‘tamiz, Belarusda 9-avgust kuni bo‘lib o‘tgan saylovlarni soxtalashtirish haqidagi ma’lumotlar fonida norozilik namoyishlari boshlandi va haligacha davom etmoqda. Namoyishchilar Lukashenkoni saylovni soxtalashtirishda ayblamoqda. Saylov natijalariga ko‘ra, Aleksandr Lukashenko 80 foiz ovoz to‘plagan.
Belarus Markaziy saylov komissiyasi ma’lumotlariga ko‘ra, Svetlana Tixanovskaya prezidentlik saylovida 10,1 foiz ovoz to‘plagan. Tixanovskayaning o‘zi esa mag‘lubiyatini tan olmadi va o‘zini “Belarus xalqi tomonidan saylangan yagona yetakchi” deb atadi. Saylovdan ikki kun o‘tgach Tixanovskaya Litvaga chiqib ketgan. Uning safdoshlari Tixanovskaya hukumat bosimi ostida mamlakatdan chiqib ketganini ma’lum qilgan.
Muxolifat Belarusda yangi saylovlar o‘tkazish va konstitutsiyaviy islohotlarni talab qilmoqda.
Sobiq prezidentlikka nomzod Svetlana Tixanovskayaning tarafdorlari 18-avgust kuni yangi saylovlar o‘tkazish orqali mamlakatda hokimiyatni tranzit qilish maqsadida Muvofiqlashtiruvchi kengash tuzdi. Belarus bosh prokurori Aleksandr Konyukning ta’kidlashicha, Muxolifat Muvofiqlashtirish kengashi faoliyati konstitutsiyaga qarshi va hokimiyatni qo‘lga olishga qaratilgan.
Kengashning tashkil etilishi munosabati bilan Jinoyat kodeksining 361-moddasi bilan jinoyat ishi qo‘zg‘atilib, uning doirasida Muvofiqlashtiruvchi kengashning bir nechta vakillari hibsga olingan.
Izoh (0)