O‘zbekistonda xizmat ko‘rsatgan yurist Habibulla Mullaberdiyorovich Abdualiyev 2020-yil 17-sentabr kuni 88 yoshida vafot etdi, deya xabar beradi “Yangi O‘zbekiston” nashri.
Abdualiyev Habibulla Mullaberdiyorovich 1932-yil 26-oktabrda Toshkent shahrida ziyoli oilasida tug‘ilgan. Habibulla Abdualiyevning otasi Alimov Mullaberdiyorxon Toshkent shahri “Darxon” masjidining imomi, bobosi Abdullo muftiy unvonida faoliyat ko‘rsatgan.
U 1955–1960-yillarda O‘rta Osiyo davlat universitetining yuridik fakultetida tahsil olgan va ayni bir vaqtning o‘zida shu fakultetning uslubchisi vazifasida o‘z mehnat faoliyatini boshlagan.
Abdualiyev 1959–2002-yillar davomida Toshkent davlat universitetining yuridik fakultetida Ma’muriy va moliya huquqi kafedrasi laboranti, o‘qituvchisi, katta o‘qituvchisi, Davlat huquqi va boshqaruvi kafedrasi dotsenti, yuridik fakulteti dekan o‘rinbosari lavozimlarida faoliyat ko‘rsatgan.
Unga 1983-yilda unga O‘zbekiston Oliy Soveti Prezidiumi farmoni bilan “O‘zbekistonda xizmat ko‘rsatgan yurist” unvoni berilgan.
Habibulla Abdualiyev tomonidan O‘zbekiston Konstitutsiyasi, Davlat huquqi masalalariga bag‘ishlangan 40 dan ortiq maqola, kitob va metodik qo‘llanmalar yozilgan. Ularda davlat organlari, deputatlarning huquq va burchlari, davlatlarning suveren huquqlari, Konstitutsiya va qonunning ustuvorligi, mustaqil davlatning bosh qonuni, saylov tizimlari, saylov huquqi, xalq deputatlari, davlat organlari tushunchasi va tizimi, konstitutsiyaviy huquq va uning dasturi kabi mavzular yoritilgan.
Izoh (0)