Ўзбекистонда хизмат кўрсатган юрист Ҳабибулла Муллабердиёрович Абдуалиев 2020 йил 17 сентябрь куни 88 ёшида вафот этди, дея хабар беради «Янги Ўзбекистон» нашри.
Абдуалиев Ҳабибулла Муллабердиёрович 1932 йил 26 октябрда Тошкент шаҳрида зиёли оиласида туғилган. Ҳабибулла Абдуалиевнинг отаси Алимов Муллабердиёрхон Тошкент шаҳри «Дархон» масжидининг имоми, бобоси Абдулло муфтий унвонида фаолият кўрсатган.
У 1955–1960 йилларда Ўрта Осиё давлат университетининг юридик факультетида таҳсил олган ва айни бир вақтнинг ўзида шу факультетнинг услубчиси вазифасида ўз меҳнат фаолиятини бошлаган.
Абдуалиев 1959–2002 йиллар давомида Тошкент давлат университетининг юридик факультетида Маъмурий ва молия ҳуқуқи кафедраси лаборанти, ўқитувчиси, катта ўқитувчиси, Давлат ҳуқуқи ва бошқаруви кафедраси доценти, юридик факультети декан ўринбосари лавозимларида фаолият кўрсатган.
Унга 1983 йилда унга Ўзбекистон Олий Совети Президиуми фармони билан «Ўзбекистонда хизмат кўрсатган юрист» унвони берилган.
Ҳабибулла Абдуалиев томонидан Ўзбекистон Конституцияси, Давлат ҳуқуқи масалаларига бағишланган 40 дан ортиқ мақола, китоб ва методик қўлланмалар ёзилган. Уларда давлат органлари, депутатларнинг ҳуқуқ ва бурчлари, давлатларнинг суверен ҳуқуқлари, Конституция ва қонуннинг устуворлиги, мустақил давлатнинг бош қонуни, сайлов тизимлари, сайлов ҳуқуқи, халқ депутатлари, давлат органлари тушунчаси ва тизими, конституциявий ҳуқуқ ва унинг дастури каби мавзулар ёритилган.
Изоҳ (0)