Shavkat Mirziyoyev Nukusga jo‘nab ketdi. Ushbu safar chog‘ida Qoraqalpog‘istonning yangi rahbari nomi ma’lum bo‘lishi mumkin

O‘zbekiston Prezident Shavkat Mirziyoyev 2-oktabr kuni Nukusga jo‘nab ketdi. Bu haqda Prezident matbuot xizmati xabar berdi.

Qayd etilishicha, davlat rahbari Qoraqalpog‘iston Jo‘qorg‘i Kengesining navbatdan tashqari sessiyasida ishtirok etadi. Safar davomida, shuningdek, bunyodkorlik ishlari, yangi korxonalar faoliyati bilan tanishish rejalashtirilgan.

Eslatib o‘tamiz, Qoraqalpog‘istonda 20-sentabr kuni Jo‘qorg‘i Kengesning bo‘shab qolgan 5 ta deputatlik o‘rni uchun saylovlar bo‘lib o‘tgan edi. Saylov yakunlariga ko‘ra Nukus shahri bo‘yicha 4-sonli “Yernazar Alako‘z” saylov okrugidan “Adolat” partiyasi ko‘rsatgan nomzod Gulxatcha Ayimbetova (1961-yilda tug‘ilgan), Ellikqal’a tumani bo‘yicha 20-sonli “Sarabiy” saylov okrugidan O‘zLiDeP ko‘rsatgan nomzod Bayrambay O‘temuratov (1977-yilda tug‘ilgan), Beruniy tumani bo‘yicha 25-sonli “Navbahor” saylov okrugidan O‘zXDP ko‘rsatgan nomzod Adilbek Reimboyev (1977-yilda tug‘ilgan), Qo‘ng‘irot tumani bo‘yicha 49-sonli “Qo‘ng‘irot” saylov okrugidan “Milliy tiklanish” partiyasi ko‘rsatgan nomzod Paxratdin Aytjanov (1967-yilda tug‘ilgan) va Qorao‘zak tumani bo‘yicha 63-sonli “Qorako‘l” saylov okrugida Ekopartiya ko‘rsatgan nomzod Murat Kamalov (1955-yilda tug‘ilgan) Jo‘qorg‘i Kenges deputati etib saylangan.

Eslatib o‘tamiz, Qoraqalpog‘iston Jo‘qorg‘i Kengesining avvalgi raisi Musa Yerniyazov 31-iyul kuni koronavirus asoratlaridan vafot etgan edi. Qoraqalpog‘iston Konstitutsiyasining 80-moddasiga binoan, Jo‘qorg‘i Kenges raisi Qoraqalpog‘istonning rahbari va eng yuqori amaldoridir. Rais Jo‘qorg‘i Kenges tomonidan O‘zbekiston Prezidenti bilan kelishilgan holda Jo‘qorg‘i Kengesning vakolat muddati davomida maxfiy ovoz berish orqali Jo‘qorg‘i Kenges deputatlari orasidan saylanadi.