Qashqadaryo viloyatida 45 ta bog‘cha karantin qoidalariga amal qilgan holda o‘z faoliyatini qayta boshladi. Maktabgacha ta’lim vazirligi tashkil etilganiga uch yil to‘lishi munosabati bilan viloyatda 1250-bog‘cha ochildi. Bu haqda bog‘cha ochilishida ishtirok etgan viloyat maktabgacha ta’lim boshqarmasi boshlig‘i Asror Alimardonov xabar berdi.
Ta’kidlanishicha, 2020-yil 30-sentabr kuni viloyatning Koson tumanida faoliyat boshlagan “Koson bahor qaldirg‘ochlari” davlat-xususiy sherikchilik asosidagi maktabgacha ta’lim tashkiloti viloyatdagi shunday maktabgacha ta’lim tashkilotlaridan bola sig‘imi, ingliz tilini o‘rgatishga chuqurlashtirilganligi, ayniqsa, o‘quv va metodik qo‘llanmalar bilan mukammal darajada ta’minlanganligi, shart-sharoitlarning eng so‘nggi, zamonaviy ekanligi bilan ajralib turadi.
Tadbirda so‘z olgan Asror Alimardonovning ma’lumot berishicha, vazirlik tashkil etilgan 2017-yilda viloyatda 326 ta maktabgacha ta’lim tashkiloti 13,2 foiz qamrov bilan faoliyat yuritgan bo‘lsa, ayni kunda viloyatdagi bog‘chalar soni 1250 ta, qamrov esa 41 foizga yetgan.
“‘Koson bahor qaldirg‘ochlari’ davlat-xususiy sherikchilik asosidagi maktabgacha ta’lim tashkiloti 4 milliard 800 million so‘m evaziga barpo etilgan bo‘lib, shundan 3 milliard 300 million so‘mi 1 foizli kredit hisoblanadi. Tadbirkor esa o‘z mablag‘idan 1 milliard 500 million so‘m sarflagan. Bog‘cha 200 o‘rinli bo‘lib, ta’lim ingliz tilida olib boriladi”, — deydi viloyat maktabgacha ta’lim boshqarmasi boshlig‘i.
Ma’lum qilinishicha, viloyatdagi 1250 ta maktabgacha ta’lim tashkilotining 865 tasi nodavlat MTT, 385 tasi davlat MTTlari hisoblanadi.
Alimardonovning qo‘shimcha qilishicha, o‘z faoliyatini boshlagan ta’lim muassasalaridagi pedagog xodimlar koronavirusga test topshirgan va sog‘lomligi aniqlangan.
“30-sentabr sanasiga qadar viloyatdagi bog‘chalarda faoliyat yurituvchi mavjud pedagog xodimlarning 35-37 foizi koronavirusga test topshirdi. Ayni paytda faoliyat ko‘rsatayotgan nodavlat va davlat bog‘chalari xodimlari orasidan koronavirus aniqlanmagan”, — deydi Asror Alimardonov.
Asror Alimardonovning qo‘shimcha qilishicha, uning o‘zi ham koronavirusga chalinib, 22 kun davomida davolanib chiqqan. Ayni paytda esa sog‘lig‘i yaxshi. Faoliyatini davom ettirmoqda.
Izoh (0)