Қашқадарё вилоятида 45 та боғча карантин қоидаларига амал қилган ҳолда ўз фаолиятини қайта бошлади. Мактабгача таълим вазирлиги ташкил этилганига уч йил тўлиши муносабати билан вилоятда 1250-боғча очилди. Бу ҳақда боғча очилишида иштирок этган вилоят мактабгача таълим бошқармаси бошлиғи Асрор Алимардонов хабар берди.
Таъкидланишича, 2020 йил 30 сентябрь куни вилоятнинг Косон туманида фаолият бошлаган «Косон баҳор қалдирғочлари» давлат-хусусий шерикчилик асосидаги мактабгача таълим ташкилоти вилоятдаги шундай мактабгача таълим ташкилотларидан бола сиғими, инглиз тилини ўргатишга чуқурлаштирилганлиги, айниқса, ўқув ва методик қўлланмалар билан мукаммал даражада таъминланганлиги, шарт-шароитларнинг энг сўнгги, замонавий эканлиги билан ажралиб туради.
Тадбирда сўз олган Асрор Алимардоновнинг маълумот беришича, вазирлик ташкил этилган 2017 йилда вилоятда 326 та мактабгача таълим ташкилоти 13,2 фоиз қамров билан фаолият юритган бўлса, айни кунда вилоятдаги боғчалар сони 1250 та, қамров эса 41 фоизга етган.
«‘Косон баҳор қалдирғочлари’ давлат-хусусий шерикчилик асосидаги мактабгача таълим ташкилоти 4 миллиард 800 миллион сўм эвазига барпо этилган бўлиб, шундан 3 миллиард 300 миллион сўми 1 фоизли кредит ҳисобланади. Тадбиркор эса ўз маблағидан 1 миллиард 500 миллион сўм сарфлаган. Боғча 200 ўринли бўлиб, таълим инглиз тилида олиб борилади», — дейди вилоят мактабгача таълим бошқармаси бошлиғи.
Маълум қилинишича, вилоятдаги 1250 та мактабгача таълим ташкилотининг 865 таси нодавлат МТТ, 385 таси давлат МТТлари ҳисобланади.
Алимардоновнинг қўшимча қилишича, ўз фаолиятини бошлаган таълим муассасаларидаги педагог ходимлар коронавирусга тест топширган ва соғломлиги аниқланган.
«30 сентябрь санасига қадар вилоятдаги боғчаларда фаолият юритувчи мавжуд педагог ходимларнинг 35-37 фоизи коронавирусга тест топширди. Айни пайтда фаолият кўрсатаётган нодавлат ва давлат боғчалари ходимлари орасидан коронавирус аниқланмаган», — дейди Асрор Алимардонов.
Асрор Алимардоновнинг қўшимча қилишича, унинг ўзи ҳам коронавирусга чалиниб, 22 кун давомида даволаниб чиққан. Айни пайтда эса соғлиғи яхши. Фаолиятини давом эттирмоқда.
Изоҳ (0)