O‘zbekistonda normativ-huquqiy hujjatlar loyihasi muhokamaga qo‘yilmasa, avtomatik rad etiladigan tartib o‘rnatiladi

O‘zbekiston Milliy matbuot markazida 29-sentabr kuni Adliya vazirligi rasmiylari ishtirokida matbuot anjumani bo‘lib o‘tdi.

Tadbirda 3666-sonli prezident qarorida normativ-huquqiy hujjatlar loyihalari qabul qilinishidan oldin portalga muhokama uchun joylashtirish lozimligi belgilanganiga qaramay, ushbu talabga har doim ham rioya qilinmayotgani, shu bois uni qonun bilan mustahkamlash kerakligi xususida savol berildi.

Savolga javoban Adliya vazirligi bo‘lim boshlig‘i Alibek Raxmetov yangi qabul qilinayotgan qonun bilan ushbu masalaga yechim topilishini aytdi.

“Afsuski, bunday hujjatlar ko‘p uchrayapti. Bularga nisbatan biz, albatta, qonunchilik talabiga rioya qilinmaganligi to‘g‘risida xulosamizni beramiz. Ushbu tartibni qonun darajasida belgilash lozimligi haqida to‘g‘ri fikr bildirdingiz. Adliya vazirligi tomonidan ‘Normativ-huquqiy hujjatlar to‘g‘risida’gi yangi tahrirdagi qonun loyihasi ishlab chiqilgan va ushbu loyihada qaysi hujjatlar jamoatchilik muhokamasidan o‘tishi, qaysilari o‘tmasligi to‘g‘risidagi qoidalarni aniq belgilab qo‘yganmiz”, – dedi Alibek Raxmetov.

Adliya vazirligi boshqarma boshlig‘i Dilafruz Sufiyeva javobga qo‘shimcha qilar ekan, yuqoridagi qonun bilan kelgusida har bitta normativ-huquqiy hujjat qabul qilinishidan oldin tartibga solish ta’sirini baholashdan o‘tkazilishi lozimligi, agarda jamoatchilik muhokamasiga e’lon qilinmasa, avtomatik ravishda qabul qilinmasligini bildirdi.

https://youtu.be/ZOiGKg4saEI?t=2872

Ma’lumot uchun, Prezidentning 3666-sonli qaroriga asosan, barcha NHHlar loyihalari loyihani ishlab chiquvchi tashkilotlar tomonidan Yagona interaktiv davlat xizmatlari portaliga jamoatchilik muhokamasi o‘tkazilishi uchun joylashtirilishi lozim. Ammo amaliyotda bu normaga rioya etilmasligi holatlari uchrab turibdi.