O‘zbekiston bosh vazir o‘rinbosari, YuNESKO masalalari bo‘yicha milliy komissiya raisi Aziz Abduhakimov 28-sentabr kuni YuNESKO bosh direktori Odri Azule bilan Xalqaro axborotdan erkin umumfoydalanish kunini nishonlashga bag‘ishlangan yuqori darajali onlayn muhokamada ishtirok etdi. Bu haqda Turizmni rivojlantirish davlat qo‘mitasi xabar berdi.
Ma’lum qilinishicha, tadbir 28—29-sentabr kunlari Jahon sog‘liqni saqlash tashkiloti, Xalqaro arxivlar kengashi, BMT Taraqqiyot dasturi, Twitter ijtimoiy tarmog‘i, “Ochiq hukumat” hamkorligi tashabbusi, Transparency International ilmiy-ishlab chiqarish birlashmasi kabi yetakchi tashkilot va tuzilmalarning rahbariyati ishtirokida o‘tkazilmoqda.
Ta’kidlanishicha, O‘zbekiston bu kabi nufuzli forumga taklif qilingan yagona mamlakat hisoblanadi.
Axborotning COVID-19 pandemiyasiga qarshi kurashishdagi muhim rolini inobatga olib, tadbir uchun “Axborot olish — hayotlarni qutqarib, ishonchni mustahkamlab, umid bag‘ishlab” mavzusi tanlangan. Ma’ruzachilar pandemiya sharoitida jamiyatni axborot bilan ta’minlashning turli jihatlarini xalqaro tuzilmalar, davlat va nodavlat tashkilotlar, shuningdek, xususiy sektor nuqtayi nazaridan yoritdi.
Aziz Abduhakimov O‘zbekistonda Prezident Shavkat Mirziyoyev boshchiligida OAVni rivojlantirish bo‘yicha amalga oshirilayotgan keng ko‘lamli islohotlarga oid taqdimot o‘tkazdi. O‘zbekistonda OAVni liberallashtirish va ularning jamiyatdagi rolini mustahkamlash, so‘z erkinligi va jurnalistlar huquqlarini targ‘ib qilish, hukumat faoliyati ochiqligi va shaffofligini ta’minlash, davlat tashkilotlari hamda aholi o‘rtasidagi muloqotni mustahkamlash yo‘lida qilingan ishlar aniq misollar bilan yoritib berildi. Mamlakatda olib borilayotgan islohotlar mevasi o‘laroq, jamiyat hayotida ijtimoiy-siyosiy faol qatlamning paydo bo‘layotgani, kuchli fuqarolik jamiyati sari ildam qadamlar qo‘yilayotganiga alohida urg‘u berdi.
Qo‘mita xabarida aytilishicha, yuqori darajali onlayn muhokama davomida O‘zbekiston hukumatining YuNESKO bilan hamkorlikdagi Xalqaro axborotdan erkin umumfoydalanish kuni bo‘yicha xalqaro anjumanini 2021-yilning kuzida Toshkent shahrida o‘tkazish istagi bildirildi.
Qayd etilishicha, ushbu tadbirni O‘zbekistonda tashkil qilishga doir kelishuvga Axborot va ommaviy kommunikatsiyalar agentligi rahbariyatining YuNESKO bosh direktori Odri Azule bilan 2020-yilning 9-yanvarida Parij shahrida bo‘lib o‘tgan uchrashuvi davomida erishilgan.
Bosh vazir o‘rinbosari keyingi yilga rejalashtirilgan ushbu anjuman davlatlarda yuz berishi mumkin bo‘lgan axboriy inqirozlar va muammolarning oldini olish va ularga qarshi kurashish yo‘lida YuNESKO hamda boshqa xalqaro tashkilotlar bilan hamkorlikni yanada mustahkamlash yo‘lida xizmat qilishini ta’kidladi.
YuNESKO bosh direktori Odri Azule va tadbirning boshqa ishtirokchilari O‘zbekiston hukumatiga kelgusi yilda bu qadar muhim tadbirni o‘tkazishga tayyor ekanligi uchun samimiy minnatdorlik bildirdi.
Avvalroq Milliy mass-mediani qo‘llab-quvvatlash va rivojlantirish jamoat fondi YeXHTning O‘zbekistondagi loyihalari koordinatori bilan birgalikda axborotdan umumfoydalanishga bag‘ishlangan xalqaro onlayn konferensiya tashkil qilishi haqida xabar berilgandi.
Izoh (0)