Samarqand viloyatining Ishtixon tumanida Isuzu rusumli avtobus haydovchisi velosipedda ketayotgan 18 va 19 yoshli fuqarolarni urib yubordi. Natijada 18 yoshli yigit voqea joyida vafot etdi.
Mazkur holat bo‘yicha “Daryo” muxbiri Farhod Norbo‘tayev marhumning ota-onasi va yaqinlari bilan suhbatda bo‘ldi.
Ma’lum qilinishicha, 2020-yilning 26-iyun kuni kech soat taxminan 21:15 da Ishtixon tumanining “Shayxlar” mahallasidan tuman markaziga eltuvchi yo‘lda B.M. ismli shaxs boshqaruvidagi Isuzu avtobusi velosipedda ketayotgan 18 yoshli Lochinbek Elmurodov va 19 yoshli Bekzod Asamovni urib yuborgan. Natijada Lochinbek Elmurodov olgan tan jarohatlari sabab voqea joyida vafot etgan. Voqea joyiga yetib kelgan tez tibbiy yordam shifokori YTH qurboni o‘z farzandi ekanligini ko‘rgan.
“18 yil farzandini katta qilib, mana shunday fojia sabab umri xazon bo‘lganini ko‘rish — har qanday ota-ona uchun azob. Bolamning orzulari ko‘p edi: o‘qishga kirishni niyat qilib yurgandi. Afsuski, mudhish voqea sabab u bu yorug‘ olamni erta tark etdi, — deydi marhumning otasi Olim Ulug‘murodov. — Bo‘lgan voqeani taqdir deyishimiz mumkin, ammo haydovchi o‘zini oqlash uchun turli bahonalar qilmoqda. Go‘yo hammasiga farzandim aybdordek. Ammo o‘sha kuni o‘g‘lim bilan uning o‘rtog‘i ham bo‘lgan. U hamma voqealarni ko‘rgan. Lekin hamma ishlar haydovchini oqlashga qaratilyapti”.
Olim Ulug‘murodovning ta’kidlashicha, avtohalokat sodir bo‘lgan kuni haydovchi B.M. mast bo‘lgan. Surishtiruv davomida berilgan ko‘rsatmalar ham turli xil bo‘lgan.
Voqea sodir bo‘lgan kuni marhum bilan birgalikda do‘konga borgan, voqeaning bevosita guvohi bo‘lgan Bekzod Asamov bilan ham suhbatlashdik. U holat qayerda va qanday sodir bo‘lganligini aytib berdi.
“Soat taxminan 20:30 da do‘kondan sovg‘a olish uchun velosipedda yo‘lga chiqdik. Ikkimiz velosipedni almashib haydab ketayotgan edik. Yarim yo‘lga kelganda charchaganimiz uchun almashib olmoqchi edik. Avtobus kelayotganini ko‘rib yo‘lning chekkasida to‘xtadik. Endi velosipedni haydab ketmoqchi bo‘lib turganimizda avtobus orqamizdan kelib urdi. Biz yo‘lning chetida to‘xtab turgandik, — deydi Bekzod Asamov. — Avtohalokatdan keyingi voqealarni eslay olmayman. Hushimga kelganimda shifoxonada ekanligimni bildim. Do‘stim olamdan o‘tganini eshitdim”.
Bekzod Asamov avtohalokat soat taxminan 21:15 atrofida sodir bo‘lganligini ma’lum qildi. Sababi soat 21:05 atrofida ularga qo‘ng‘iroq bo‘lgan. Shundan so‘ng 10 daqiqa o‘tib, ularni avtobus urib ketgan.
“Yoz faslida kun uzun bo‘ladi. Voqea shom payti bo‘lgandi. Ammo haydovchi avtohalokat qorong‘ida bo‘lganligini aytmoqda”, — deydi Bekzod Asamov.
Marhum Lochinbek Elmurodovning akasi Shahzod Ulug‘murodovning aytishicha, u kelganida Bekzod Asamov avtobusda bo‘lgan.
“Otam tez yordamda ishlaydi. Voqea sodir bo‘lganidan so‘ng tez yordamga xabar berilganida chaqiriqqa otam kelgan. Kelib ko‘rsa, o‘zining o‘g‘li shu ahvolda yotibdi. Ular ukamga birinchi yordam berdik, deb aytyapti. Ammo tez yordam kelganida ularning o‘zlari bo‘lmagan, — deydi Shahzod Ulug‘murodov. — Otam hayajonlanganidanmi yoki o‘sha kungi voqeani eslagisi kelmagani uchunmi, bularni sizga aytib berish yodidan ko‘tarildi”.
Shahzod Ulug‘murodovning ta’kidlashicha, voqeani 1989-yilda tug‘ilgan qishloqdoshi ham ko‘rgan. U YTHga uchraganlar qishloqdoshlari ekanligini ko‘rib, tez yordam va IIBga qo‘ng‘iroq qilgan. O‘sha paytda Lochinbek Elmurodov va Bekzod Asamov tut daraxtining tagida yotgan. Bekzod Asamov esa “Lochin qani?” deb ingrayotgan bo‘lgan.
“Haydovchi o‘zi yordam qilganini aytyapti. Aslida tez yordamga ham qishloqdoshim qo‘ng‘iroq qilgan. Axir tez yordamdan otam kelgan-ku? Ukamni o‘zim mashinaga mindirdim. Yotgan vaqti ko‘zi qimirlaganday bo‘ldi. Borganimizda joni uzilib bo‘lgan ekan. Shunchalik qattiq urilganki, narsalari sochilib ketgan. Oddiygina urganida cho‘ntakdagi narsalari chiqib ketmas edi”, — deydi marhumning akasi Shahzod Ulug‘murodov.
Jurnalistik surishtiruv davomida ma’lum bo‘lishicha, Ishtixon tuman IIB huzuridagi Tergov bo‘limi tomonidan haydovchi B.M.ga nisbatan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, dastlabki tergov harakatlari tamomlanib, B.M.ga nisbatan qamoqqa olish tarzidagi ehtiyot chorasi qo‘llanilgan.
Izoh (0)