O‘zbekistonda haftaning birinchi qismida yomg‘ir yog‘ishi kutilmoqda

O‘zbekiston hududi 29—30-sentabrda balandlikdagi siklon ta’sirida bo‘ladi, deb xabar bermoqda “O‘zgidromet”. Respublika bo‘yicha bulutlilik ortishi kutilmoqda.

29-sentabrda ko‘plab viloyatlarning ayrim joylariga yomg‘ir yog‘adi. Faqat Qoraqalpog‘istonda, Xorazm va Buxoro viloyatlarida yog‘ingarchilik bo‘lmaydi. 30-sentabrda Toshkent, Samarqand, Jizzax, Sirdaryo viloyatlari va Farg‘ona vodiysida yomg‘ir yog‘adi. Baland tog‘li hududlarda yog‘ayotgan yomg‘ir qorga aylanish ehtimoli bor.

29—30-sentabrda kunduzgi harorat 15-20 darajagacha pasayadi, bu iqlimiy me’yordan 6-8 darajaga pastdir.

1—3-oktabrda butun mamlakat hududida ob-havoning yog‘ingarchiliksiz bo‘lishi kutilmoqda. Respublika bo‘yicha ayrim joylarga tuman tushishi mumkin. Tunda va ertalab sovuq havo oqimining ta’siri saqlanib turadi, harorat 5-8 darajagacha pasayadi. Kunduzi quyosh nurlari havoni asta isitib, harorat 22-25 darajagacha ko‘tariladi.