22-sentabrda Polsha milliy xotira instituti (IPN) Facebook’dagi sahifasida 1964-yilning fevral oyida Jeyms Albert Bond ism-sharifli britaniyalik 36 yoshli erkakning mamlakatga kelganini oshkor etdi. U Britaniya elchixonasining harbiy vakilida arxivarius lavozimida ishlay boshlagan. Bond tezda kontrrazvedka idoralarining e’tiborini tortgan. Erkakning josus bo‘lishi mumkinligi gumon qilinib, uni kuzatish ishlari boshlangan.
U vaqtda Jeyms Bond haqidagi 14 ta kitobning 11 tasi chiqib bo‘lgan (Yan Flemingning 007 raqamli josus haqidagi “Royal kazinosi” kitobi 1953-yilda nashr qilingandi) va bondiananing ikkita ekranizatsiyasi, ya’ni Shon Konneri bosh rolni ijro qilgan “Doktor Nou” hamda “Rossiyadan muhabbat bilan” nomli filmlar taqdim qilingandi.
The Telegraph nashrining yozishicha, Jeyms Albert Bond 1928-yilda Devon grafligining Bideford shaharchasida tug‘ilgan. Uning ota-onasi qishloq xo‘jaligida band bo‘lgan. 1954-yilda u Janett Takki ismli ayolga uylangan va bir nafar o‘g‘il farzandli bo‘lgan. Bond harbiy xizmatda deyarli 60 yil ishlagan. U 2005-yilda vafot etgan.
Polsha milliy xotira instituti direktori Marjena Kruk Reuters’ga bergan intervyusida bir vaqtlar mamlakatga kelgan Bond ham adabiy qahramon kabi ayollarni, ichkilikni yaxshi ko‘rgan, biroq kinodagi personaj kabi martinini emas, aksincha pivo ichishni afzal bilgan.
Bondning rafiqasi Janett Takki The Telegraph’ga bergan intervyusida erining rostan ham Britaniya josusi bo‘lgani haqida gapirgan. Biroq juftlik Polshaga kelgan vaqtida ayol turmush o‘rtog‘ining sirli ishlar bilan shug‘ullanganini sezmagan. Janett xonim oila Polshaga kelgan vaqtida ular doimiy ravishda kuzatuv ostida bo‘lganini eslagan.
Polsha arxivlaridagi ma’lumotlar bo‘yicha, Bond ikki marta Belostok hamda Olshtinda SSSR nazorati ostidagi harbiy obyektlarga kirishga uringan. Ammo mahalliy aholi vakillari bilan muloqot o‘rnatishga urinmagan. 1965-yilda Bond Polshani tark etgan. Jeyms Bond bevasining aytishicha, ushbu qarorga erining lavozimi ko‘tarilgani sabab bo‘lgan.
O‘sha vaqtda Jeyms Albert Bondni nima uchun Polshaga yuborishgani hanuzgacha aniqlanmagan. Ushbu ma’lumot Britaniya arxivlaridagi ma’lumotlarning maxfiylik muhri olib tashlanmaguniga qadar sir bo‘lib qoladi. Polsha milliy xotira instituti buning o‘ziga xos hazil bo‘lgani yoki Buyuk Britaniya qirolligi ushbu qaror orqali maxsus razvedka idoralarini chalg‘itishga uringan bo‘lishi mumkinligini taxmin qilgan.
Izoh (0)