O‘zbekiston shimoliga 26—27-sentabrda Qozog‘iston orqali Shimoliy Ural ustida shakllangan sovuq antisiklon tarmog‘i kira boshlaydi, deb xabar bermoqda “O‘zgidromet”. Havo harorati kechasi 8-13 daraja, kunduzi 20-25 daraja, shimoliy tumanlarda kechasi 5-10 daraja, kunduzi 15-20 darajani tashkil qiladi. Qayd etilishicha, bunday harorat shu kun me’yorlaridan 3-4 darajaga pastdir.
Qoraqalpog‘istonda, Xorazm viloyati va cho‘l zonasida harorat 5-7 darajaga pasayishi kutilmoqda, shamolning tezligi sekundiga 15-20 metrgacha kuchayishi mumkin.
Keyingi haftaning birinchi yarmida butun respublika hududi shu sovuq antisiklon ta’sirida bo‘ladi. Bu kunlarda O‘zbekiston bo‘yicha bulutlilik ortadi, mamlakatning tekislik hududida ob-havo yog‘ingarchiliksiz bo‘ladi, faqat tog‘oldi va tog‘li hududlarda ayrim joylarga yomg‘ir yog‘ishi mumkin. 29—30-sentabrda baland tog‘li tumanlarda yomg‘irning qorga o‘tish ehtimoli ham bor.
Sovuq front o‘tishi natijasida 28-sentabrda butun respublika hududida shamolning tezligi 15-20 metr/sekundgacha kuchayishi mumkin. Harorat asta pasayadi va shu kunlarda kechasi 5-10 daraja, shimolda kechasi 2-7 daraja iliq, kunduzi 15-20 daraja iliq bo‘ladi. Uraldan sovuq havo kirib turishi natijasida respublika bo‘yicha harorat foni o‘rtacha iqlimiy me’yorlardan 5-7 darajaga past bo‘ladi.
Izoh (0)