AQSh Xitoydan paxta import qilishni cheklashga tayyorgarlik ko‘rmoqda. Ushbu hafta AQSh bojxona va chegarani qo‘riqlash agentligi Sinszyan provinsiyasidagi yana beshta Xitoy kompaniyasining importiga taqiq qo‘ydi — “qora ro‘yxat” to‘qqiztaga yetdi, deb yozadi Spot.
Sanksiyalarga majburiy mehnatdan foydalanilishi sabab bo‘lmoqda. Taqiqlarning aksariyati paxtaga taalluqli, Sinszyan esa Xitoydagi jami paxtaning 2/3 qismini yetkazib beradi.
Amerikaning Forbes jurnali yozishicha, bu kabi o‘zgarishlarda O‘zbekiston yaqqol ko‘zga tashlanmoqda. Yaqin vaqtlargacha paxta dalalarida majburiy mehnatga oddiy holat sifatida qarab kelinardi, biroq so‘nggi yilda hukumat muammo bilan jiddiy shug‘ullanib, uni imkon boricha bartaraf etishga urinmoqda.
Nashrning ta’kidlashicha, mamlakat bu ishni hatto AQSh tomonidan bosim o‘tkazilmayotgan bo‘lsa-da, amalga oshirmoqda, chunki Amerika notinch Afg‘oniston mintaqasi sabab strategik ahamiyatga ega davlat bilan munosabatlarni buzishni istamaydi.
Forbes asosiy yutuqlarni sanab o‘tgan — dalalarda majburiy bolalar mehnati yo‘q, terimchilarga to‘lanadigan haq oshgan, paxtaga davlat buyurtmasi bekor qilingan. Shu sababli The Economist O‘zbekistonni yil mamlakati deb atagan.
“O‘zbekiston majburiy mehnatni qisqartirish yo‘lida tez odimlamoqda. U hozirga qadar Xitoy paxtasi egallagan joyni band etishi mumkin. Bu O‘zbekistonni Markaziy Osiyoning global miqyosdagi integratsiyalashgan iqtisodiyotiga aylanishida ijobiy ta’sir ko‘rsatgan bo‘lar edi”, — deyiladi maqolada.
Mavzuga doir: Angliya yuqori sudi o‘zbek paxtasini Yevropa Ittifoqiga eksport qilishga qarshi da’voni rad etdi
2019-yilning 4-fevralida o‘sha vaqtdagi bosh vazir o‘rinbosari Tanzila Norboyeva boshchiligidagi delegatsiyaning Vashingtonga ishchi tashrifida Cotton Campaign to‘qimachilik mahsulotlariga qarshi boykotni bekor qilish bo‘yicha rejasini taqdim etgan edi.
Izoh (0)