“Bavariya” 24-sentabr kuni bo‘lib o‘tgan Yevropa Superkubogi uchrashuvida “Sevilya”ni mag‘lubiyatga uchratdi.
Budapeshtdagi “Pushkash Arena”da o‘tkazilgan o‘yinning asosiy vaqti durang bilan yakun topdi (1:1). Qo‘shimcha bo‘limlarda myunxenliklar gol urgan holda sovrinni qo‘lga kiritdi.
Shu tariqa nemis klubi UEFA Superkubogi tarixida ilk bor ispan jamoasini mag‘lubiyatga uchratdi.
Bunga qadar ispan va nemis klublari mazkur musobaqada ikki bor to‘qnash kelgan va ularda Bundesliga jamoalari “Barselona”ga mag‘lub bo‘lgandi. 1992-yilda katalonlar “Verder”ni (1:1, 2:1) taslim etgan bo‘lsa, 1997-yilda Dortmundning “Borussiya”si (2:0, 1:1) dog‘da qoldirilgan.
“Bavariya” 2019/20-yilgi mavsumda Chempionlar Ligasida g‘olib chiqdi va o‘z tarixida ikkinchi marta UEFA Superkubogini qo‘lga kiritdi. Birinchi marta jamoa 2013-yilda mazkur sovrinni boshi uzra ko‘targandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)