Ўзбекистонда ўқитувчиларнинг коронавирусга чалиниш статистикаси яшириляптими? Нурмат Отабеков жавоб берди

Ўқитувчиларнинг коронавирус билан касалланиш ҳолатлари қайд этилган алоҳида рақамлар умумий статистикада ажратиб кўрсатилмайди. Бу ҳақда АОКА ҳузуридаги штабда ўтказилган брифингда Республика махсус комиссияси ва Коронавирусга қарши кураш штаби аъзоси Нурмат Отабеков маълум қилган.

Жумладан, мутахассис «Ўқитувчиларда COVID-19 аниқланди, деган хабарлар тарқалмоқда. Нимага статистикада кўрсатилмаяпти? Самарқанд вилоятининг Пайариқ, Жомбой туманларида 100 яқин ўқитувчиларда вирус аниқланди, деб хабар беришди. Бухорода қанчадан қанча ўқитувчиларда аниқланди, деб ёзишмоқда, лекин нима учун статистикада улар кўрсатилмаяпти?», деган саволга аниқлик киритиб ўтган.

Статистик рақамлар шаклланишига эътибор берадиган бўлсак, лаборатория усулида текширилиб, мусбат натижа олинганларнинг барчаси инобатга олинади. Статистик рақамлар бир кунда уч марта янгиланиб, эътиборингизга ҳавола қилиняпти. Биз уларнинг орасида ўқитувчиларни алоҳида тоифаларга (касб билан боғлиқ) ажратиб рақамларда кўрсатмаяпмиз. Бу амалиёт бошқа соҳа вакилларига ҳам бир хил таъсир қилади. Коронавирус бўйича беморлар ҳақидаги умумий маълумотни эътиборингизга ҳавола қиляпмиз. Буларнинг бирортасини статистик маълумотларга киритмасликдан ҳеч қандай манфаат йўқ.

Нурмат Отабеков, Республика махсус комиссияси ва Коронавирусга қарши кураш штаби аъзоси

Айтиш керакки, Ўзбекистонда пандемия шароитида ўқитувчи ва ўқувчиларнинг соғлиғини ҳимоя қилиш мақсадида мактаб ўқитувчиларидан оммавий равишда COVID-19’га тест олиниши йўлга қўйилган, шу вақтгача Пайариқда 60 нафар, Самарқанд вилоятининг Жомбой туманида 40 нафар, Андижон, Жиззах ва Самарқанд вилоятларидаги ўнлаб, Бухоро вилоятида 239 нафар, Қашқадарёда 855 нафар ўқитувчиларда коронавирус аниқлангани ҳақида хабар берилди.