Farg‘ona YuNESKOning Ta’lim shaharlari global tarmog‘iga qabul qilindi, deb xabar beradi “Dunyo” agentligi. Ushbu maqom o‘qimishli shaharlarni rivojlantirish vositalari va strategiyalaridan foydalanish, mutaxassislar va ekspertlar bilan muloqot qilish hamda hamkorlik aloqalarini o‘rnatishga imkonini beradi.
Farg‘ona nomzodini O‘zbekistonning YuNESKO ishlari bo‘yicha milliy komissiyasi tavsiya etgan. Uni ro‘yxatga qo‘shish to‘g‘risidagi qaror 23-sentabr kuni Parijda e’lon qilingan.
Ma’lumotlarga ko‘ra, Farg‘ona ushbu kunda global harakatga qo‘shilgan Markaziy Osiyodagi yagona shahar hisobanadi. Shuningdek, Ta‘lim shaharlari global tarmog‘iga bundan tashqari 26 mamlakatdan 54 yangi a‘zo ham qabul qilingan.
Farg‘ona viloyati hokimligi matbuot xizmatining yozishicha, mazkur shaharlar uzluksiz ta‘limning samarali siyosati va amaliyoti inklyuziv, xavfsiz, sifatli va barqaror shaharlarning rivojlanishini qo‘llab-quvvatlashi va tashkilotning 2030-yilga oid dasturiga o‘z hissasini qo‘shishi mumkinligini isbotlagan. Yangi a‘zolar YuNESKO Ta‘lim shaharlari global tarmog‘i tarkibida mavjud shaharlar umumiy sonini 64 mamlakatda 230 taga yetkazgan.
YuNESKOning Uzluksiz ta‘lim instituti (UIL) tarmoq muvofiqlashtiruvchisi sifatida tegishli mamlakatlarda YuNESKO ishlari bo‘yicha Milliy komissiyalar tomonidan nomzodlar berilgandan so‘ng yangi a‘zolarni qabul qiladi. Shahar hokimi va ma‘muriyatining uzluksiz ta‘limga oid qat‘iy majburiyati ta‘lim shahriga aylanishning asosiy shartidir. YuNESKO Ta‘lim shaharlari global tarmog‘i potentsial a‘zolari ariza berish jarayonida jamiyatda barcha uchun uzluksiz ta‘lim imkoniyatlarini taqdim etish bo‘yicha aniq tasavvurni namoyish etishlari kerak. Yangi qabul qilingan shaharlar tashkilot faoliyatida ishtirok etishlari va o‘zlarining ta‘lim shaharlari sifatida erishgan yutuqlarini aks ettiradigan ikki yillik hisobotni tayyorlashlari lozim.
Izoh (0)