SSV farzandlarini maktabga yuborayotgan ota-onalarga tavsiyalar bilan chiqdi

Sog‘liqni saqlash vazirligining o‘quv-tarbiya muassasalari bo‘yicha bosh mutaxassisi karantin ta’tilidan keyin farzandlarini maktabga yuborayotgan ota-onalarga tavsiyalar bilan chiqdi.

Ttibbiyot fanlari doktori Inobat Ahmedovaning qayd etishicha, ota-onalar, avvalo, farzandini maktabga yuborishdan oldin ularning sog‘ligiga va ruhiy holatiga, albatta, e’tibor berishlari kerak. “Shu o‘rinda psixologlar tarafidan bunday uzoq karantindan chiqish uchun vaqt (kamida uch hafta) talab etilishini inobatga olib, sizdan bolaning hissiy holatiga e’tibor berishingizni so‘raladi”, — deydi u.

Bolada o‘tgan vaqt davomidagi o‘zlashtira olmagan bilimlariga yetib olishi uchun paydo bo‘lishi mumkin bo‘lgan stressni yengishga ko‘maklashish kerak. Karantin ta’tilidan keyin bola maktabda yomon baholar olishi mumkin. Bunday holatda unga tanbeh bermaslikka harakat qilish lozim.

“Doimiy tanbehlar sabab o‘g‘lingiz yoki qizingizning o‘ziga, kuchli tomonlariga bo‘lgan ishonchini yo‘qotishiga yo‘l qo‘ymang. Farzandingizning sog‘lig‘ini kuzatib boring va agar unda kasallik belgilari (yuqori tana harorati, hansirash, yo‘tal, hid va ta’m sezmaslik, qorinda og‘riq, ich ketishi) paydo bo‘lsa, uni ta’lim muassasasiga yubormang” — deydi Inobat Ahmedova.

Shuningdek, bolaga quyidagi gigiyena qoidalarini o‘rgatishga chaqirdi:

• qo‘llarini sovun va toza suv bilan tez-tez yuvib turish;
• sovun va suv bo‘lmasa, qo‘llar uchun spirt asosidagi dezinfeksiya vositasidan foydalanish (spirt miqdori kamida 60 foiz bo‘lishi kerak);
• faqat toza ichimlik suvidan foydalanish;
• jamoat hojatxonalari hamda uy hojatxonalarining tozaligiga e’tibor berish va foydalanish tartibiga rioya qilishni;
• chiqindilarni xavfsiz hamda to‘g‘ri yig‘ish, saqlash va utilizatsiya qilish ko‘nikmalari;
• nafas olish gigiyenasiga rioya qilish: yo‘tal va aksirganda og‘iz-burunni mato yoki tirsak yordamida to‘sish;
• kaft bilan yuzga, ko‘zlarga, og‘iz va burunga tegmaslik.

Ta’lim muassasasi ma’muriyati va pedagoglari bilan ma’lumot almashinish maqsadida doimiy muloqotda bo‘lib, maktab xavfsizligini ta’minlash borasidagi sa’y-harakatlar bilan tanishib, qo‘llab-quvvatlashga harakat qiling”, — deb tavsiya bergan vazirlikning o‘quv-tarbiya muassasalari bo‘yicha bosh mutaxassisi.

Eslatib o‘tamiz, maktablarda yangi 2020/2021-o‘quv yili rasman 14-sentabrdan boshlanadi. O‘quvchilar maktabga borishi yoki onlayn o‘qishi mumkin. Sanitariya talablariga javob bermaydigan maktablar o‘qishni masofaviy tarzda olib boradi. 7-sentabr kuni 6 oy deganda 329 ta maktab o‘quvchilar uchun o‘z eshiklarini ochdi. Xususan, Namangandagi 12 ta maktabda tajriba tariqasidagi ilk darslar boshlandi.

Avvalroq Xalq ta’limi vazirligi masofadan o‘qitiladigan bolalarning ota-onalariga tavsiyalar bilan chiqqandi.