ССВ фарзандларини мактабга юбораётган ота-оналарга тавсиялар билан чиқди

Соғлиқни сақлаш вазирлигининг ўқув-тарбия муассасалари бўйича бош мутахассиси карантин таътилидан кейин фарзандларини мактабга юбораётган ота-оналарга тавсиялар билан чиқди.

Ттиббиёт фанлари доктори Инобат Аҳмедованинг қайд этишича, ота-оналар, аввало, фарзандини мактабга юборишдан олдин уларнинг соғлигига ва руҳий ҳолатига, албатта, эътибор беришлари керак. «Шу ўринда психологлар тарафидан бундай узоқ карантиндан чиқиш учун вақт (камида уч ҳафта) талаб этилишини инобатга олиб, сиздан боланинг ҳиссий ҳолатига эътибор беришингизни сўралади», — дейди у.

Болада ўтган вақт давомидаги ўзлаштира олмаган билимларига етиб олиши учун пайдо бўлиши мумкин бўлган стрессни енгишга кўмаклашиш керак. Карантин таътилидан кейин бола мактабда ёмон баҳолар олиши мумкин. Бундай ҳолатда унга танбеҳ бермасликка ҳаракат қилиш лозим.

«Доимий танбеҳлар сабаб ўғлингиз ёки қизингизнинг ўзига, кучли томонларига бўлган ишончини йўқотишига йўл қўйманг. Фарзандингизнинг соғлиғини кузатиб боринг ва агар унда касаллик белгилари (юқори тана ҳарорати, ҳансираш, йўтал, ҳид ва таъм сезмаслик, қоринда оғриқ, ич кетиши) пайдо бўлса, уни таълим муассасасига юборманг» — дейди Инобат Аҳмедова.

Шунингдек, болага қуйидаги гигиена қоидаларини ўргатишга чақирди:

• қўлларини совун ва тоза сув билан тез-тез ювиб туриш;
• совун ва сув бўлмаса, қўллар учун спирт асосидаги дезинфекция воситасидан фойдаланиш (спирт миқдори камида 60 фоиз бўлиши керак);
• фақат тоза ичимлик сувидан фойдаланиш;
• жамоат ҳожатхоналари ҳамда уй ҳожатхоналарининг тозалигига эътибор бериш ва фойдаланиш тартибига риоя қилишни;
• чиқиндиларни хавфсиз ҳамда тўғри йиғиш, сақлаш ва утилизация қилиш кўникмалари;
• нафас олиш гигиенасига риоя қилиш: йўтал ва аксирганда оғиз-бурунни мато ёки тирсак ёрдамида тўсиш;
• кафт билан юзга, кўзларга, оғиз ва бурунга тегмаслик.

Таълим муассасаси маъмурияти ва педагоглари билан маълумот алмашиниш мақсадида доимий мулоқотда бўлиб, мактаб хавфсизлигини таъминлаш борасидаги саъй-ҳаракатлар билан танишиб, қўллаб-қувватлашга ҳаракат қилинг», — деб тавсия берган вазирликнинг ўқув-тарбия муассасалари бўйича бош мутахассиси.

Эслатиб ўтамиз, мактабларда янги 2020/2021-ўқув йили расман 14 сентябрдан бошланади. Ўқувчилар мактабга бориши ёки онлайн ўқиши мумкин. Санитария талабларига жавоб бермайдиган мактаблар ўқишни масофавий тарзда олиб боради. 7 сентябрь куни 6 ой деганда 329 та мактаб ўқувчилар учун ўз эшикларини очди. Хусусан, Намангандаги 12 та мактабда тажриба тариқасидаги илк дарслар бошланди.

Аввалроқ Халқ таълими вазирлиги масофадан ўқитиладиган болаларнинг ота-оналарига тавсиялар билан чиққанди.