Yaponiyaning Fukui shahrida yashovchi 3 ayol hosilni payhon etadigan maymunlarga qarshi pnevmatik qurol bilan kurashishni boshladi. “Korrespondent.net”ning yozishicha, ayollar o‘zlarini “maymun ovchilari” deb atagan.
Qayd qilinishicha, 74 yashar Masako Ishimura, 68 yashar Tasuko Kinoshita va 67 yoshli Miyuki Ii “dushman”ni ko‘rishi bilan qurolini ishga soladi. Lekin ularning maqsadi maymunlarni o‘ldirish emas, balki qo‘rqitib qo‘yishdan iborat.
Maymunlar besh yil avval qishloq xo‘jaligi mahsulotlarini payhon qilishni boshlagan va ularga qarshi turli yo‘llar bilan kurashilganiga qaramay kutilgan natijaga erishilmagan. Shundan keyin ayollar hosilni himoya qilish maqsadida otish mashqlari kursiga qatnagan, deyiladi xabarda.
“Biz maymunlarning qishloq aholisi yetishtirgan qimmatbaho sabzavotlarni yo‘q qilishiga yo‘l qo‘ymaymiz”, — deydi Ishimura.
Uning qo‘shimcha qilishicha, aksariyat qishloq aholisi sabzavot hamda mevalar yetishtirish uchun ko‘p kuch sarflaydi va ushbu harakatlar behuda ketmasligi kerak.
Izoh (0)