O‘zbekiston mezbonlik qiladigan U-19 Osiyo chempionati 3 ta shahar stadionlarida o‘tkaziladi

Futbol bo‘yicha yoshlar o‘rtasidagi U-19 Osiyo chempionatining 2020-yilgi musobaqasiga O‘zbekiston mezbonlik qiladi.

Musobaqa 14—31-oktabr kunlari bo‘lib o‘tadi. Uchrashuvlar uchta shahardagi beshta stadionda o‘tkaziladi:

• Toshkent shahridagi “Bunyodkor”, “Lokomotiv” va “Paxtakor” stadionlarida;
• Namangan shahridagi “Navbahor” stadionida;
• Olmaliq shahridagi “OKMK” o‘yingohida.

Eslatib o‘tamiz, U-19 Osiyo chempionatida jami 16 mamlakatning yoshlar terma jamoalari ishtirok etadi. O‘zbekiston “A” guruhida Eron, Indoneziya va Kamboja bilan kuch sinashadi.

Mazkur musobaqa 2021-yili Indoneziyada bo‘lib o‘tadigan U-20 Jahon chempionatiga saralash vazifasini ham o‘taydi. Unga ko‘ra, O‘zbekistonda o‘tadigan musobaqaning yarim finalchilari Jahon chempionatiga yo‘llanma oladi.