Superliga hamda O‘zbekiston terma jamoasi futbolchilari FIFA futbol simulyatoridan o‘rin oladi

O‘zbekiston Professional futbol ligasi (PFL) va O‘zbekiston futbolchilari uyushmasi (O‘FU) bilan 2024-yil so‘ngiga qadar memorandum imzoladi. Bu haqda PFL rasmiy saytida xabar berildi.

Qayd etilishicha, ushbu memorandumning asosiy yo‘nalishlari quyidagilardan iborat bo‘ladi: konstruktiv va o‘zaro manfaatli munosabatlarni o‘rnatish hamda rivojlantirish, Superliga, Pro-Liga, Birinchi liga, ayollar futboli va boshqa shu kabi musobaqalarda ishtirok etuvchi futbolchilarning huquq va manfaatlarini hamjihatlikda himoya qilish, futbolchilik faoliyatidan keyingi hayot tarziga to‘g‘ri yo‘naltirish, mamlakat futboli rivoji uchun yangi malakali kadrlarni tayyorlash.

Endilikda O‘zPFL O‘FUni O‘zbekistondagi professional futbolchilarni birlashtiruvchi yagona vakil sifatida qabul qiladi. Shuningdek, O‘FU FIFPro (Xalqaro futbolchilar uyushmalari federatsiyasi) uyushmasining O‘zbekistondagi yagona eksklyuziv vakili va hamkori sifatida tan olinadi.

Tavsiya: Mirjalol Qosimov, Maksim Shatskix, Odil Ahmedov, Sardor Rashidov, Eldor Shomurodovlarning legioner sifatida urgan top-10 goli

Ko‘p holatlarda futbol klublari tuzilgan shartnomaning bir nusxasini futbolchilarga taqdim etmaydi. Aniqrog‘i, futbolchilarning aksarida o‘z huquqlarini talab qilib olish ko‘nikmasi mavjud emas. Endilikda tomonlar bu masalani tartibga soladi. Ya’ni O‘FUga a’zo futbolchi so‘roviga ko‘ra, futbolchining mehnat shartnomasi aslidan Nizolarni hal qilish palatasiga ko‘chirma beriladi. Shuningdek, tomonlar futbolchi va futbol klubi o‘rtasidagi mehnat shartnomalarini FIFA talablari asosida tartibga solish hamda minimal talablarga javob beradigan yagona namunaviy shartnomani ishlab chiqish ustida ishlaydi.

Diyor Imomxo‘jayev, O‘zPFL rahbari

O‘zaro kelishuv asosida ayol futbolchilarning professional shartnomalarini har tomonlama himoya qilgan holda, O‘zbekistonda ayol futbolchilarga bo‘lgan e’tiborni yanada oshirish, shu orqali ayollar futboli mavqesining oshishiga erishish ustida ham ishlanadi.

Ayrim mamlakatlarda homilador ayollar bilan professional shartnomalarni bekor qilish holatlari uchrayotgani achinarli holat. FIFPro bunday tashabbuslarga qarshi kurashadi. Shuningdek, o‘z huquqini himoya qilishga iymanib, klublarga reglamentga zid harakatlarni amalga oshirish imkonini taqdim etayotgan futbolchilar masalasini tartibga solish yo‘lida mehnat qiladi.

Kamoliddin Murzoyev, O‘FU rahbari

Ta’kidlanishicha, O‘FU futbolchilar salomatligi yo‘lida antidoping qoidalariga rioya qilish bo‘yicha tushuntirishlar berish, kelishilgan o‘yinlarga qarshi keskin kurashish va ularning salbiy oqibatlari haqida futbolchilarni ogohlantirish, bunday o‘yinlardan xabar topganda O‘zPFLni xabardor qilish, O‘zPFL huzurida amaliy va tashkiliy masalalarda futbolchilarning vakili sifatida ishtirok etish, ularni qo‘llab-quvatlash kabi masalalar bilan shug‘ullanadi.

Kelishuvga ko‘ra Superliga hamda milliy terma jamoa futbolchilarining imij huquqlaridan foydalangan holda Xalqaro futbolchilar uyushmalari federatsiyasi bilan hamkorlikda Electronic Arts Sports kompaniyasining FIFA futbol o‘yin simulyatoriga O‘zbekiston Professional futbol ligasida ro‘yxatdan o‘tgan futbolchilarni jalb qilib, ularni jahonga tanitish masalasi ustida ham ishlanadi.