Ўзбекистон Профессионал футбол лигаси (ПФЛ) ва Ўзбекистон футболчилари уюшмаси (ЎФУ) билан 2024 йил сўнгига қадар меморандум имзолади. Бу ҳақда ПФЛ расмий сайтида хабар берилди.
Қайд этилишича, ушбу меморандумнинг асосий йўналишлари қуйидагилардан иборат бўлади: конструктив ва ўзаро манфаатли муносабатларни ўрнатиш ҳамда ривожлантириш, Суперлига, Про-Лига, Биринчи лига, аёллар футболи ва бошқа шу каби мусобақаларда иштирок этувчи футболчиларнинг ҳуқуқ ва манфаатларини ҳамжиҳатликда ҳимоя қилиш, футболчилик фаолиятидан кейинги ҳаёт тарзига тўғри йўналтириш, мамлакат футболи ривожи учун янги малакали кадрларни тайёрлаш.
Эндиликда ЎзПФЛ ЎФУни Ўзбекистондаги профессионал футболчиларни бирлаштирувчи ягона вакил сифатида қабул қилади. Шунингдек, ЎФУ FIFPro (Халқаро футболчилар уюшмалари федерацияси) уюшмасининг Ўзбекистондаги ягона эксклюзив вакили ва ҳамкори сифатида тан олинади.
Кўп ҳолатларда футбол клублари тузилган шартноманинг бир нусхасини футболчиларга тақдим этмайди. Аниқроғи, футболчиларнинг аксарида ўз ҳуқуқларини талаб қилиб олиш кўникмаси мавжуд эмас. Эндиликда томонлар бу масалани тартибга солади. Яъни ЎФУга аъзо футболчи сўровига кўра, футболчининг меҳнат шартномаси аслидан Низоларни ҳал қилиш палатасига кўчирма берилади. Шунингдек, томонлар футболчи ва футбол клуби ўртасидаги меҳнат шартномаларини ФИФА талаблари асосида тартибга солиш ҳамда минимал талабларга жавоб берадиган ягона намунавий шартномани ишлаб чиқиш устида ишлайди.Ўзаро келишув асосида аёл футболчиларнинг профессионал шартномаларини ҳар томонлама ҳимоя қилган ҳолда, Ўзбекистонда аёл футболчиларга бўлган эътиборни янада ошириш, шу орқали аёллар футболи мавқесининг ошишига эришиш устида ҳам ишланади.Диёр Имомхўжаев, ЎзПФЛ раҳбари
Айрим мамлакатларда ҳомиладор аёллар билан профессионал шартномаларни бекор қилиш ҳолатлари учраётгани ачинарли ҳолат. FIFPro бундай ташаббусларга қарши курашади. Шунингдек, ўз ҳуқуқини ҳимоя қилишга ийманиб, клубларга регламентга зид ҳаракатларни амалга ошириш имконини тақдим этаётган футболчилар масаласини тартибга солиш йўлида меҳнат қилади.Таъкидланишича, ЎФУ футболчилар саломатлиги йўлида антидопинг қоидаларига риоя қилиш бўйича тушунтиришлар бериш, келишилган ўйинларга қарши кескин курашиш ва уларнинг салбий оқибатлари ҳақида футболчиларни огоҳлантириш, бундай ўйинлардан хабар топганда ЎзПФЛни хабардор қилиш, ЎзПФЛ ҳузурида амалий ва ташкилий масалаларда футболчиларнинг вакили сифатида иштирок этиш, уларни қўллаб-қуватлаш каби масалалар билан шуғулланади.Камолиддин Мурзоев, ЎФУ раҳбари
Келишувга кўра Суперлига ҳамда миллий терма жамоа футболчиларининг имиж ҳуқуқларидан фойдаланган ҳолда Халқаро футболчилар уюшмалари федерацияси билан ҳамкорликда Electronic Arts Sports компаниясининг ФИФА футбол ўйин симуляторига Ўзбекистон Профессионал футбол лигасида рўйхатдан ўтган футболчиларни жалб қилиб, уларни жаҳонга танитиш масаласи устида ҳам ишланади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)