Shuhrat G‘aniyev: Farg‘ona viloyatida uysiz birorta oila qolmaydi

Farg‘ona viloyati hokimligining axborot xizmati viloyatda 2020-yil oxirigacha 10 140 ta uy qurilib, kam ta’minlangan, muhtoj, ko‘p bolali, oila a’zolaridan biri nogiron bo‘lgan oilalarga topshirilishini xabar qildi.

Qayd etilishicha, hududda aholi zich ekani bois uy-joy mavzelari Markaziy Farg‘ona cho‘llari tomon kirib bormoqda. 2020-yilning qolgan qismida qumloq barxanlar, o‘zlashtirilmagan yerlarda 1400 ta yakka tartibdagi har biri olti sotix yerga ega namunali loyiha uylaridan quriladi.

Xabarga ko‘ra, Oltiariq tumanining Markaziy Farg‘ona cho‘llaridagi yerlarida qurilish ishlari olib borilmoqda. Bu yerda 10 ta yakka tartibdagi uylar quriladi va sentabrgacha uylarning 5 tasi foydalanishga topshiriladi. Uylar aholiga hukumat qaroriga ko‘ra ipoteka krediti asosida beriladi. Ya’ni oila uyning umumiy narxidan dastlabki o‘n foizini to‘laydi. Qolgan 90 foizi 20 yillik kreditga beriladi.

Farg‘ona viloyati hokimi Shuhrat G‘aniyev cho‘l massivida qurilayotgan uylar, quruvchi-mutaxassislar bilan uchrashib, ular bilan suhbatlashgan.

“Viloyatimizdan 44 ming mehnat muhojiri Rossiyada quruvchi bo‘lib ishlagan va pandemiya tufayli qaytib ketolmagan. Biz ularning 39 mingini viloyatdagi qurilish obyektlariga ishga joyladik”, – degan Shuhrat G‘aniyev.

Shuningdek, viloyat elektr tarmoqlari boshqarmasi o‘zining ishchi xizmatchilari uchun Markaziy Farg‘onada 50 ta yakka tartibdagi 6 sotixli uy-joylar qurmoqda. Kasaba uyushmalari bilan kelishgan holda uyning dastlabki 10 foizli to‘lovini korxona to‘lab beradi. Qolgan qismiga xodimlar uchun 20 yillik kredit rasmiylashtiriladi.

“Farg‘ona viloyatida uysiz birorta oila qolmaydi. Maqsadimiz hukumat oldimizga qo‘ygan vazifani bajarib, odamlar bugun baxtli yashashini ta’minlash”, – degan Farg‘ona viloyati hokimi Markaziy Farg‘ona cho‘llarida bo‘lgan uchrashuvlarda.