Navoiy shahridagi “Yoshlar” sport majmuasida pandemiya davrida bemorlarga birlamchi tibbiy xizmat ko‘rsatish maqsadida 400 o‘rinli tashxislash, saralash, taqsimot punkti faoliyat boshladi, deya xabar bermoqda O‘zA.
Ma’lum qilinishicha, Navoiy shahar hokimligi tomonidan tibbiy ko‘rik uchun zamonaviy tibbiyot anjomlari bilan ta’minlangan punktga bemorlarga malakali tibbiy xizmat ko‘rsatish uchun 44 nafar tibbiyot xodimi jalb etildi.
Shuningdek, bemorlar uchun 200 ta kislorodli o‘rin-joy tayyorlandi.
Mazkur vaqtinchalik shifo maskaniga tez tibbiy yordam bo‘limiga harorati ko‘tarilib, murojaat etgan bemorlar keltirilib, ularning ahvoli o‘ta og‘ir, og‘ir va yengilligiga qarab saralanadi. Bemorlarning klinik belgilaridan kelib chiqib, ular shifoxonaga yoki uyida davolanish uchun yo‘naltiriladi.
Avvalroq Zangiota sanatoriysi koronavirusga chalingan bemorlarni davolash kompleksiga aylantirilgani haqida xabar berilgan edi. Bundan tashqari Urganch shahrida koronavirus yuqtirib olgan bemorlarni davolash uchun 708 o‘rinli maxsus markazlar tashkil etilgani haqida xabar berilgan edi. Bundan tashqari Uchtepa tumanida joylashgan Atlas mebel markazida koronavirusga qarshi kurash doirasida navbatdagi taqsimlash markazi tashkil etilayotgani xabar qilingan edi.
Ayni paytda Yunusobod tumanidagi “O‘zekspomarkaz”ning 3-pavilyonida 1000 o‘rinlik maxsus markaz faoliyat yuritmoqda (mas’ul – Toshkent shahar hokimligi). Shuningdek, 1 va 2-pavilyonlarda yana 814 ta koyka tayyorlanmoqda (mas’ul – Mudofaa vazirligi gospitali).
Shuningdek, Yunusoboddagi gimnastika saroyida 750 o‘rinli (mas’ul – IIV gospitali), Shayxontohur tumanidagi “Yoshlik” sport majmuasida 520 o‘rinli (mas’ul – DXX gospitali) birinchi tibbiy yordam markazlari foydalanishga topshirilishi kutilyotgan edi. Sergeli tumanidagi 2-son BO‘SM 250 o‘rinli davolash maskani etib qayta jihozlanyapti deb xabar berilgan.
Bundan avval O‘zbekiston davlat jahon tillari universiteti yotoqxonasi va Chilonzor tumanidagi Cardio Star Plus xususiy klinikasi (50 ta o‘rin) ham koronavirusga gumon qilinganlarni vaqtincha saqlash maskanlariga aylantirilgani aytilgandi.
Izoh (0)