Навоийда 400 ўринли тақсимот пункти иш бошлади
Навоий шаҳридаги «Ёшлар» спорт мажмуасида пандемия даврида беморларга бирламчи тиббий хизмат кўрсатиш мақсадида 400 ўринли ташхислаш, саралаш, тақсимот пункти фаолият бошлади, дея хабар бермоқда ЎзА.
Маълум қилинишича, Навоий шаҳар ҳокимлиги томонидан тиббий кўрик учун замонавий тиббиёт анжомлари билан таъминланган пунктга беморларга малакали тиббий хизмат кўрсатиш учун 44 нафар тиббиёт ходими жалб этилди.
Шунингдек, беморлар учун 200 та кислородли ўрин-жой тайёрланди.
Мазкур вақтинчалик шифо масканига тез тиббий ёрдам бўлимига ҳарорати кўтарилиб, мурожаат этган беморлар келтирилиб, уларнинг аҳволи ўта оғир, оғир ва енгиллигига қараб сараланади. Беморларнинг клиник белгиларидан келиб чиқиб, улар шифохонага ёки уйида даволаниш учун йўналтирилади.
Аввалроқ Зангиота санаторийси коронавирусга чалинган беморларни даволаш комплексига айлантирилгани ҳақида хабар берилган эди. Бундан ташқари Урганч шаҳрида коронавирус юқтириб олган беморларни даволаш учун 708 ўринли махсус марказлар ташкил этилгани ҳақида хабар берилган эди. Бундан ташқари Учтепа туманида жойлашган Atlas мебель марказида коронавирусга қарши кураш доирасида навбатдаги тақсимлаш маркази ташкил этилаётгани хабар қилинган эди.
Айни пайтда Юнусобод туманидаги «Ўзэкспомарказ»нинг 3-павильонида 1000 ўринлик махсус марказ фаолият юритмоқда (масъул – Тошкент шаҳар ҳокимлиги). Шунингдек, 1 ва 2-павильонларда яна 814 та койка тайёрланмоқда (масъул – Мудофаа вазирлиги госпитали).
Шунингдек, Юнусободдаги гимнастика саройида 750 ўринли (масъул – ИИВ госпитали), Шайхонтоҳур туманидаги «Ёшлик» спорт мажмуасида 520 ўринли (масъул – ДХХ госпитали) биринчи тиббий ёрдам марказлари фойдаланишга топширилиши кутилётган эди. Сергели туманидаги 2-сон БЎСМ 250 ўринли даволаш маскани этиб қайта жиҳозланяпти деб хабар берилган.
Бундан аввал Ўзбекистон давлат жаҳон тиллари университети ётоқхонаси ва Чилонзор туманидаги Cardio Star Plus хусусий клиникаси (50 та ўрин) ҳам коронавирусга гумон қилинганларни вақтинча сақлаш масканларига айлантирилгани айтилганди.
