AQSh prezidenti Donald Tramp HBO telekanaliga bergan intervyusida, noyabrga qadar Afg‘onistondagi Amerika kontingentining soni 8 mingdan 4 ming kishiga kamayishi haqida ma’lumotni tasdiqladi, deya xabar bermoqda “RBK”.
Suhbat chog‘ida jurnalist prezidentga, hozir Afg‘onistondagi Amerika qo‘shinlari soni Barak Obama davridagi kabi ekanligini aytdi. Shuningdek, u Tramp hokimiyatga kelganida Afg‘onistonda 8800 amerikalik askar bo‘lgani, keyin bu raqam 14 000 ga yetgani va endi yana 8500 ga qisqartirilayotganini ta’kidladi.
“Yo‘q, siz nohaqsiz. Biz yaqin orada Afg‘onistondagi qo‘shinlarimiz sonini 4 mingga qisqartiramiz va o‘ylaymanki, noyabr oyidagi saylov vaqtida ularning mamlakatdagi soni 4-5 mingta bo‘ladi”, – deb javob qaytardi prezident.
Jurnalist dastlab Tramp Amerika qo‘shinlarini Afg‘onistondan butunlay olib chiqishga va’da berganini eslatdi. Bunga javoban Prezident to‘rt yil oldin vaziyat boshqacha bo‘lganligi va muhim hududlar ISHID terrorchilik guruhi tomonidan nazorat qilinayotganiga e’tiroz bildirdi.
“Biz ularning rahbarlarini yo‘q qildik. Men o‘zimdan avvalgi ko‘pchilik qilmagan narsalarni qildim – dunyodagi eng katta terrorchilik tashkilotini mag‘lubiyatga uchratdim”, – deya qo‘shimcha qildi Tramp.
Avvalroq, turli ommaviy axborot vositalarida AQSh ma’muriyati Afg‘onistondagi harbiylar sonini kamaytirish niyati borligi haqida o‘z manbalariga tayanib xabar tarqatgan edi. Masalan, 27-iyun kuni CNN harbiylar sonini 4,5 mingga yetkazish bo‘yicha fundamental qaror qabul qilinganligini aytdi. Rasmiy Vashington amerikalik harbiylar mamlakatni tark etsa, “Tolibon” guruhi hukumat bilan kelishuvlarni buzishi mumkinligidan va ular Kobulga yangi hujumlar tashkil qilishidan xavotirda.
Eslatib o‘tamiz, iyun oxirida The New York Times gazetasi Rossiya harbiy razvedka bo‘linmasi “Tolibon” harakatiga bog‘liq jangarilarga Afg‘onistondagi xalqaro koalitsiya harbiylarini o‘ldirganlik uchun maxfiy ravishda mukofot taklif qilgani to‘g‘risida yozgandi. “Tolibon” harakati esa Rossiya buyurtmasiga ko‘ra, amerikalik harbiylarni o‘ldirgani to‘g‘risidagi maqolaga raddiya berib, o‘zlari biror-bir razvedka organi yoki xorij davlatining foydasiga bog‘lanmaganini bildirgan.
O‘z navbatida Oq uy AQSh razvedka xizmati prezident Donald Trampga Rossiyaning amerikalik harbiylarning o‘ldirilishi uchun “Tolibon”ga mukofot taklif qilgani to‘g‘risida hisobot bermaganini ma’lum qilgan. Shundan so‘ng Washington Post gazetasi ham Afg‘onistondagi AQSh harbiylari Rossiya va “Tolibon”ning kelishuvi oqibatida halok bo‘lgani to‘g‘risida maqola chop etgandi.
Izoh (0)