АҚШ президенти Дональд Трамп HBO телеканалига берган интервьюсида, ноябрга қадар Афғонистондаги Америка контингентининг сони 8 мингдан 4 минг кишига камайиши ҳақида маълумотни тасдиқлади, дея хабар бермоқда «РБК».
Суҳбат чоғида журналист президентга, ҳозир Афғонистондаги Америка қўшинлари сони Барак Обама давридаги каби эканлигини айтди. Шунингдек, у Трамп ҳокимиятга келганида Афғонистонда 8800 америкалик аскар бўлгани, кейин бу рақам 14 000 га етгани ва энди яна 8500 га қисқартирилаётганини таъкидлади.
«Йўқ, сиз ноҳақсиз. Биз яқин орада Афғонистондаги қўшинларимиз сонини 4 мингга қисқартирамиз ва ўйлайманки, ноябрь ойидаги сайлов вақтида уларнинг мамлакатдаги сони 4-5 мингта бўлади», – деб жавоб қайтарди президент.
Журналист дастлаб Трамп Америка қўшинларини Афғонистондан бутунлай олиб чиқишга ваъда берганини эслатди. Бунга жавобан Президент тўрт йил олдин вазият бошқача бўлганлиги ва муҳим ҳудудлар ИШИД террорчилик гуруҳи томонидан назорат қилинаётганига эътироз билдирди.
«Биз уларнинг раҳбарларини йўқ қилдик. Мен ўзимдан аввалги кўпчилик қилмаган нарсаларни қилдим – дунёдаги энг катта террорчилик ташкилотини мағлубиятга учратдим», – дея қўшимча қилди Трамп.
Аввалроқ, турли оммавий ахборот воситаларида АҚШ маъмурияти Афғонистондаги ҳарбийлар сонини камайтириш нияти борлиги ҳақида ўз манбаларига таяниб хабар тарқатган эди. Масалан, 27 июнь куни CNN ҳарбийлар сонини 4,5 мингга етказиш бўйича фундаментал қарор қабул қилинганлигини айтди. Расмий Вашингтон америкалик ҳарбийлар мамлакатни тарк этса, «Толибон» гуруҳи ҳукумат билан келишувларни бузиши мумкинлигидан ва улар Кобулга янги ҳужумлар ташкил қилишидан хавотирда.
Эслатиб ўтамиз, июнь охирида The New York Times газетаси Россия ҳарбий разведка бўлинмаси «Толибон» ҳаракатига боғлиқ жангариларга Афғонистондаги халқаро коалиция ҳарбийларини ўлдирганлик учун махфий равишда мукофот таклиф қилгани тўғрисида ёзганди. «Толибон» ҳаракати эса Россия буюртмасига кўра, америкалик ҳарбийларни ўлдиргани тўғрисидаги мақолага раддия бериб, ўзлари бирор-бир разведка органи ёки хориж давлатининг фойдасига боғланмаганини билдирган.
Ўз навбатида Оқ уй АҚШ разведка хизмати президент Дональд Трампга Россиянинг америкалик ҳарбийларнинг ўлдирилиши учун «Толибон»га мукофот таклиф қилгани тўғрисида ҳисобот бермаганини маълум қилган. Шундан сўнг Washington Post газетаси ҳам Афғонистондаги АҚШ ҳарбийлари Россия ва «Толибон»нинг келишуви оқибатида ҳалок бўлгани тўғрисида мақола чоп этганди.
Изоҳ (0)