Jamoat transportida harakat qilish o‘ylanganidan ko‘ra xavfsizroq bo‘lishi mumkin, deb xabar berdi New York Times’ga tayanib Forbes.
Mutaxassislarning aytishicha, metroda harakatlanish, uyda ovqatlanishdan ko‘ra xavfsizroq.
Koronavirus pandemiyasining sekinlashishini qayd etgan davlatlar jamoat transporti bilan bog‘liq kasallikning sezilarli tarqalishini ko‘rmadi. Transport agentliklarining so‘rovini o‘tkazgan The New York Times shunday xulosaga kelgan. Nashr metroda sayohat o‘ylanganidan ko‘ra xavfsizroq bo‘lishi mumkinligini ta’kidlaydi.
Tadqiqot natijalariga ko‘ra, metro, shaharlararo temiryo‘l transporti va avtobuslar virus tarqalishining muhim manbasi bo‘lmasligi mumkin. Bunda yo‘lovchilar niqob kiygan holda bo‘lishi va transport tig‘iz vaqtda bo‘lgani kabi to‘ldirilmasligi kerak. Mutaxassislar aytishicha, metroda harakatlanish ko‘chada piyoda yurishdan ko‘ra ko‘proq xavf tug‘dirishi mumkin, ammo umumiy ovqatlanish joylarida tushlik qilishdan ko‘ra xavfsizroq.
Mavzuga doir: O‘zbekistonda koronavirus yuqtirib olish darajasi bo‘yicha jamoat joylari va mashg‘ulotlar reytingi tuzildi
Shunga o‘xshash tadqiqot Avstriyada aprel va may oylarida o‘tkazilgan va unda ham jamoat transportining kasallik avj olishiga aloqasi topilmadi.
Tokio ma’murlari virus klasterlarini “agressiv ravishda” kuzatib borishgan va doim odam bilan to‘lgan shahar temiryo‘l tizimi bilan bog‘liq hech qanday aloqadorlikni topmagan.
Shuningdek, Gonkong ham jamoat transporti bilan bog‘liq koronavirusning keng tarqalishiga duch kelmadi, deya ma’lum qildi Stenli Xo yuqumli kasalliklar markazi direktori Devid Xuey. Shu bilan birga, u agar odamlar uydan ishlamasa, metro va avtobuslarni to‘ldirishga yo‘l qo‘ymaslik qiyinroq bo‘lishini ta’kidladi.
“Bunday holda, kasallik avj olishi mumkinligiga ishonaman”, dedi Xuey.
Yo‘lovchilar odatda metroda gaplashmaydilar, natijada havoga kamroq suyuqlik chiqariladi. Bundan tashqari, ko‘pgina shaharlarda karantin choralari va uydan ish olib borilishi tufayli poyezdlar soni kamaygan, bu esa ijtimoiy masofalanishni osonlashtirgan.
Shu bilan birga, sog‘liqni saqlash bo‘yicha mutaxassislar dalillarga ehtiyotkorlik bilan munosabatda bo‘lish kerakligini ogohlantirmoqda. Katta shaharlarda jamoat transportidan foydalanuvchi odamlar soni pandemiya avvalgi holatga ko‘ra ancha kam. Bundan tashqari, transportda ishlatiladigan shamollatish tizimlarining sifati turlicha bo‘lib, viruslarning to‘liq zanjirini kuzatib borish qiyin vazifadir.
Eslatib o‘tamiz, O‘zbekistonda jamoat transporti birinchi marta 22-mart kuni to‘xtatilgan edi. Jamoat transporti harakatiga karantin choralari yumshatilgandan so‘ng, 8-iyun kuni qayta ruxsat berildi. Mamlakatda koronavirus qayta avj olishi munosabati bilan 10-iyuldan boshlab qayta karantin rejimi joriy etildi va jamoat transporti harakati yana to‘xtatildi.
Izoh (0)