AOKAda 2020-yilning 30-iyul kuni Respublika koronavirusga qarshi kurashish shtabi a’zolari va Sog‘liqni saqlash vazirligi vakillari ishtirokida matbuot anjumani o‘tkazildi. Tadbirda OAV xodimlarini qiziqtirgan o‘nlab savollarga javob qaytarildi. Bu haqda “Daryo” muxbiri Mirolim Isajonov xabar bermoqda.
Anjumanda ta’kidlanishicha, O‘zbekistonda koronavirusdan vafot etganlarning jasadini marhumning yaqinlariga berish tartibi bo‘yicha o‘zgarish kutilmoqda.
“Koronavirus Jahon sog‘liqni saqlash tashkiloti tomonidan ikkinchi guruh, ya’ni o‘ta xavfli infeksiya guruhiga kiritildi. Bu holatda COVID-19’dan o‘lgan odam murdasi ham kasallikni chaqirish imkoniyatiga ega, deb belgilanadi. Shu munosabat bilan biz jasadlarni patalogoanomatik ko‘rsatmalar asosida yuvib, tozalab, o‘rab to‘g‘ridan to‘g‘ri ko‘mishga olib borayotgan edik.
Kuni kecha o‘tkazilgan katta yig‘ilishda bir qancha takliflar ilgari surildi va mazkur tartibga o‘zgartirish kiritish masalasi ko‘rib chiqildi.
JSST bergan tavsiyani o‘rganib chiqqanimizda, bemor vafot etganidan keyin ikki soat o‘tgach, virus murdada o‘z kuchini yo‘qotishi ma’lum bo‘ldi. Shundan kelib chiqib, jasad ikki soat saqlanganidan so‘ng uni uyiga berib yuborishga ruxsat berish taklifini kiritdik.
O‘ylaymanki, respublika komissiyasi buni ko‘rib chiqadi va rozi bo‘lsa, koronavirus o‘ta xavfli yuqumli kasalliklar guruhidan chiqarilib, murdani uyiga berish amaliyoti yo‘lga qo‘yiladi. Komissiya bugun, erta shu bo‘yicha javob berishi kutilyapti”, — dedi shtab a’zosi Anvar Alimov.
Shtab a’zosi Habibullo Oqilovning aytishicha, mazkur taklif amaliyotga joriy etilsa, marhumning janozasi 5-10 nafardan ko‘p bo‘lmagan yaqin qarindoshlari ishtirokida mozorboshida o‘qiladi.
“Ushbu taklif kechagi yig‘ilish bayonnomasiga kiritilgan. Xulosa qabul qilingach, bu to‘g‘risida, albatta, OAV orqali ma’lumot beriladi.
Xitoy, Koreya va Yaponiyadagi hamkasblarning aytishicha, mazkur davlatlarda hozirgacha koronavirusdan o‘lgan bemor jasadi dezinfeksiya qilinib, ikkita germetik paketga solinib, uyiga berilmay, to‘g‘ri krematoriyga olib borilib yoqilmoqda.
Bizda shu kungacha murdani yuvish, kafanlash kabi barcha rasm-rusumlar patalogoanatomiya byurosida bajarilib, dafn marosimi SES xodimi va yaqin qarindoshlar ishtirokida o‘tkazilayotgan edi.
O‘rganishlarimiz natijasiga ko‘ra, virus faqat tirik hujayrada yashab, jasadda ikki soatdan keyin yuqish kuchini yo‘qotadi yoki juda pasayadi. Shuni inobatga olgan holda, murda ikki, uch soat patalogoanatomiya byurosida turganidan keyin o‘sha yerda yuvilib, kafanlanadi va qarindoshlariga beriladi. Janoza baribir mozorboshida o‘qiladi va unda 5-10 nafardan ko‘p bo‘lmagan yaqin qarindoshlar ishtirok etishi tavsiya etiladi”, — dedi Oqilov.
Izoh (0)