АОКАда 2020 йилнинг 30 июль куни Республика коронавирусга қарши курашиш штаби аъзолари ва Соғлиқни сақлаш вазирлиги вакиллари иштирокида матбуот анжумани ўтказилди. Тадбирда ОАВ ходимларини қизиқтирган ўнлаб саволларга жавоб қайтарилди. Бу ҳақда «Дарё» мухбири Миролим Исажонов хабар бермоқда.
Анжуманда таъкидланишича, Ўзбекистонда коронавирусдан вафот этганларнинг жасадини марҳумнинг яқинларига бериш тартиби бўйича ўзгариш кутилмоқда.
«Коронавирус Жаҳон соғлиқни сақлаш ташкилоти томонидан иккинчи гуруҳ, яъни ўта хавфли инфекция гуруҳига киритилди. Бу ҳолатда COVID-19’дан ўлган одам мурдаси ҳам касалликни чақириш имкониятига эга, деб белгиланади. Шу муносабат билан биз жасадларни паталогоаноматик кўрсатмалар асосида ювиб, тозалаб, ўраб тўғридан-тўғри кўмишга олиб бораётган эдик.
Куни кеча ўтказилган катта йиғилишда бир қанча таклифлар илгари сурилди ва мазкур тартибга ўзгартириш киритиш масаласи кўриб чиқилди.
ЖССТ берган тавсияни ўрганиб чиққанимизда, бемор вафот этганидан кейин икки соат ўтгач, вирус мурдада ўз кучини йўқотиши маълум бўлди. Шундан келиб чиқиб, жасад икки соат сақланганидан сўнг уни уйига бериб юборишга рухсат бериш таклифини киритдик.
Ўйлайманки, республика комиссияси буни кўриб чиқади ва рози бўлса, коронавирус ўта хавфли юқумли касалликлар гуруҳидан чиқарилиб, мурдани уйига бериш амалиёти йўлга қўйилади. Комиссия бугун, эрта шу бўйича жавоб бериши кутиляпти», — деди штаб аъзоси Анвар Алимов.
Штаб аъзоси Ҳабибулло Оқиловнинг айтишича, мазкур таклиф амалиётга жорий этилса, марҳумнинг жанозаси 5-10 нафардан кўп бўлмаган яқин қариндошлари иштирокида мозорбошида ўқилади.
«Ушбу таклиф кечаги йиғилиш баённомасига киритилган. Хулоса қабул қилингач, бу тўғрисида, албатта, ОАВ орқали маълумот берилади.
Хитой, Корея ва Япониядаги ҳамкасбларнинг айтишича, мазкур давлатларда ҳозиргача коронавирусдан ўлган бемор жасади дезинфекция қилиниб, иккита герметик пакетга солиниб, уйига берилмай, тўғри крематорийга олиб борилиб ёқилмоқда.
Бизда шу кунгача мурдани ювиш, кафанлаш каби барча расм-русумлар паталогоанатомия бюросида бажарилиб, дафн маросими СЭС ходими ва яқин қариндошлар иштирокида ўтказилаётган эди.
Ўрганишларимиз натижасига кўра, вирус фақат тирик ҳужайрада яшаб, жасадда икки соатдан кейин юқиш кучини йўқотади ёки жуда пасаяди. Шуни инобатга олган ҳолда, мурда икки, уч соат паталогоанатомия бюросида турганидан кейин ўша ерда ювилиб, кафанланади ва қариндошларига берилади. Жаноза барибир мозорбошида ўқилади ва унда 5-10 нафардан кўп бўлмаган яқин қариндошлар иштирок этиши тавсия этилади», — деди Оқилов.
Изоҳ (0)