Buxoroda Bosh prokuratura huzuridagi departament DXX xodimlari bilan hamkorlikda o‘tkazgan tadbirda soxta toshlar hamda qalbakilashtirilgan tarixiy-badiiy buyumlarni sotishga ixtisoslashgan jinoiy guruh qo‘lga olindi. Bu haqda Bosh prokuratura axborot xizmati rahbari Hayot Shamsutdinov “Daryo”ga ma’lum qildi.
Xabarda qayd etilishicha, o‘tkazilgan tezkor tadbirda N.D., Sh.S. va A.M. A.D.ni bir dona qora rangli toshni go‘yoki olmos ekanligiga ishontirgan. Guruh mijozga o‘sha toshni 500 ming AQSh dollariga sotishga kelishib, undan 4,5 milliard so‘m va 51 ming AQSh dollari olayotgan paytda ushlangan.
Tadbir davomida jinoiy guruhning yana bir jinoyati aniqlangan. Ular bir dona zar matodan ishlangan kamar, bir dona charmdan ishlangan hamyon va bir dona kumushdan ishlangan qo‘lbola muhrni Buxoro amirlariga tegishli ekani, tarixiy ahamiyatga ega noyob buyumlar sirasiga kirishini aytib A.D.ni yanada ishontirish maqsadida tarixiy fotosuratlarni qalbakilashtirib, buyumlarni 100 ming AQSh dollariga sotishga uringan.
Shuningdek, A.M. kelgusida fuqarolarni ishonchiga kirib, ularni aldash yo‘li bilan noqonuniy daromad orttirish maqsadida o‘zida saqlab kelayotgan 32 turdagi jami 247 dona, turli xildagi tosh va zargarlik buyumlarini ixtiyoriy ravishda taqdim etgan hamda ashyoviy dalillar protsessual tartibda rasmiylashtirilgan.
“Mazkur holatlar yuzasidan fuqarolar N.S., Sh.S. va A.M.ga nisbatan Jinoyat kodeksining 168-moddasi (Firibgarlik) 4-qismi “a” bandi jinoyat ishi qo‘zg‘atilgan va tergov harakatlari olib borilmoqda”, – deyiladi Bosh prokuratura axborot xizmatining xabarida.
Avval Buxoro viloyati Shofirkon tumanida 38 yoshli fuqaro K.B. 72 million so‘mga baholangan to‘qqiz bosh otni aldov yo‘li bilan sotib olib, sotuvchini 62 million so‘mga “uxlatgani” uchun unga firibgarlik aybi bilan jinoyat ishi qo‘zg‘atilgani, Buxoro shahrida jinoiy guruh sifatida tovlamachilik, o‘g‘irlik, firibgarlik jinoyatlarini sodir etgan va tanishlarining pullari hamda buyumlarini talon-toroj qilgan jinoiy guruh faoliyati fosh qilingani xabar qilingan.
Shuningdek, Buxoro davlat universitetiga o‘qishga kiritib qo‘yishni va’da qilib, buning evaziga 4 ming AQSh dollari pora olishga uringan universitet o‘qituvchisi qo‘lga tushgani, Buxoro tumanida Telegram ijtimoiy tarmog‘ida nogironligi bor fuqaro nomiga guruh tashkil qilib, uning davolanishi uchun yig‘ilgan ehson pullarini o‘zlashtirgan firibgarga jinoyat ishi ochilgani haqida xabarlar berilgan.
Izoh (0)