Ўзбекистонда 28 июль соат 10:00 ҳолатига кўра 9 710 нафар бемор коронавирус инфекциясидан даволанмоқда. Бу ҳақда Соғлиқни сақлаш вазирлиги хабар бермоқда.
«Ҳозирда мамлакатимизда 9 710 нафар беморга шифокорларимиз томонидан белгиланган стандартлар бўйича даво чоралари кўрилмоқда», — дейилади ССВ ахборотида. Уларнинг қанчасида касаллик симптомларсиз кечаётгани, қанчаси касалхоналарда даволанаётганига аниқлик киритилмаган.
Қайд этиш жоиз, ССВнинг 27 июль куни соат 23:30 даги ахборотида Ўзбекистон «тиббиёт муассасаларида 9 414 нафар бемор даволанаётгани» таъкидланган эди. Эслатиб ўтамиз, касаллик енгил кечаётган беморларга 5 июлдан бошлаб уй шароитида даволанишга рухсат берилган.
Соғлиқни сақлаш вазирлигидан қўшимча қилишларича, айни вақтда даволанаётган 9 710 нафар бемордан 296 нафарининг аҳволи оғир, шундан 81 нафарининг аҳволи ўта оғир деб баҳоланмоқда.
Қайд этиш жоиз, 27 июль якунларига кўра ССВ ўша вақтда даволанаётган жами 9 414 нафар бемордан 297 нафарининг аҳволи оғир, 83 нафарининг аҳволи ўта оғир эканини маълум қилган эди. Шу билан бирга 27 июль тонгида Тошкентда коронавирусга чалинган 35 ёшли ҳомиладор аёл вафот этгани айтилди.
Маълумот учун, аҳволи оғир ва ўта оғир беморларнинг умумий сони 16 июль куни биринчи марта 60 нафардан, 17 июль куни 80 нафардан, 18 июль куни 90 нафардан, 19 июль куни 100 нафардан 21 июль куни 130 нафардан, 23 июль куни 140 нафардан, 24 июль куни 170 нафардан, 25 июль куни 190 нафардан, 26 июль куни 200 нафардан ошганди.
Изоҳ (0)