Qashqadaryo viloyatining G‘uzor tumanidagi Uzbekistan GTL zavodining 267 nafar xodimida koronavirus aniqlangan. Bu haqda viloyat hokimi Zoir Mirzayev 2020-yil 24-iyul kuni jurnalistlar bilan bo‘lgan brifingda ma’lum qildi, deya xabar berdi “Daryo” muxbiri.
Ta’kidlanishicha, COVID-19 bilan kasallangan zavod ishchilarining 126 nafari xorijlik bo‘lib, bemorlarning 104 nafari sog‘aygan.
“Hozirda korxonaning o‘zida 7212 nafar ishchi borligini inobatga olib, respublika rahbariyati yordami bilan 3 ta PZR apparati o‘rnatilib, laboratoriya tashkil qilindi, — dedi viloyat rahbari. — Hozirgi kunga qadar 710 ta test olinib, tekshirilmoqda. Korxona xodimlarini to‘liq tekshirib bo‘lish uchun kamida sakkiz kun kerak bo‘ladi”.
Qayd etilishicha, korxonada viloyat komissiyasining ko‘chma yig‘ilishi o‘tkazilib, issig‘i chiqib murojaat qilganlarni darhol boshqalardan ajratib olish va davolash uchun alohida joyga joylashtirish, test natijasini kutmasdan davolashni boshlash tizimi yo‘lga qo‘yilgan.
Eslatib o‘tamiz, avvalroq viloyatning G‘uzor tumanida qurilayotgan Uzbekistan GTL zavodi qurilishida qatnashayotgan 127 nafar kishida koronavirus aniqlangani xabar berilgandi.
Mavzuga doir:
- Zoir Mirzayev matbuot kotibi karantinga olingani haqidagi xabarga munosabat bildirib, viloyatdagi tashkilotlarning qay birida kasallikka chalinish kuzatilganini ochiqladi
- Andijon hokimi: Kuchaytirilgan karantin sabab 12 mingdan ortiq fuqaro ishsiz qoldi
- Samarqand viloyati hokimi hududdagi tashkilot mas’ullarining davlat tashkilotida bepul test topshirishga urinishini qoraladi
Izoh (0)