Toshkent shahri tumanlari rahbarlari koronavirus pandemiyasi oqibatlarini bartaraf etishda bahamjihat harakat qilish maqsadida 23-iyul kuni o‘z tumanlari aholisiga to‘g‘ridan to‘g‘ri efir orqali murojaat bilan chiqdi, deb xabar bermoqda “Kun.uz”. “Oilaviy” telekanali efirida uzatilgan murojaatda tuman hokimlari bilan birga sektor rahbarlari, Mudofaa, FVB, SSB, SEOM rahbarlari ham ishtirok etdi.
Sergeli tumani hokimi Baxtiyor Shomurodov va tuman rahbarlari o‘z vaqtida amalga oshirilmagan chora-tadbirlar natijasida o‘lim holatlari yuz bergani uchun uzr so‘radi.
Baxtiyor Shomurodov tumandagi 13-oilaviy poliklinikada COVID-19 markazi tayyorlanganini e’lon qildi. Oilaviy poliklinikalar huzurida tashkil etilgan ishonch telefoni raqamlariga koronavirus bo‘yicha murojaat qilish mumkinligi ma’lum qilindi.
Sergeli tumanining ishonch telefonlari:
(97) 410-56-57, (97) 784-57-58, (99) 030-07-37, (97) 742-57-58, (99) 898-18-08, (97) 729-57-58, (97) 146-57-58, (97) 264-57-58, (97) 783-57-58, (97) 143-57-58
Mirzo Ulug‘bek tumani hokimi Shavkat Ergashev koronavirusga qarshi kurashda tuman rahbariyati bilan birga har bir fuqaro bilan istalgan vaqtda to‘g‘ridan to‘g‘ri muloqotga tayyorligini bildirdi.
“Har birimiz to‘g‘ridan to‘g‘ri muloqot qilishga tayyormiz. Hududlarda xizmat ko‘rsatayotgan tibbiyot xodimlarining kuchi yetmagan joyda biz yuzaga kelgan muammoni hal etishga tayyor ekanimizni yana bir bor eslatib o‘tmoqchiman.
Murojaatimizning asosiy mohiyati fuqarolarimizning qo‘rquvga berilmasligi, pandemiyadan xavotir olmasliklari, biz ularning yonida ekanligimiz, tun-u kun telefon raqamlarimiz ishlab turishi, barcha savollarga javob berishimizni eslatib o‘tmoqchiman”, — dedi tuman hokimi o‘z chiqishida.
Mirzo Ulug‘bek tumanining ishonch telefonlari:
(98) 888-65-99, (99) 030-07-35, (98) 188-22-52, (99) 875-12-16, (99) 889-20-80, (99) 002-76-67, (98) 300-72-22, (90) 912-14-26, (98) 301-67-47, (99) 020-10-09.
Olmazor tumani hokimi Baxtiyor Rahmonov tumanda koronavirus infeksiyasi bilan zararlanganlar va halok bo‘lganlar mavjudligida hokimlikning ham aybi borligini tan oldi.
“Shahrimizda COVID-19 infeksiyasi bilan zararlangan fuqarolar soni ortib bormoqda. Achinarlisi, bu kasallik oqibatida hayotdan ko‘z yumayotganlar ham bor. Bunda bizning ham aybimiz bor. Shuning uchun sizlardan uzr so‘raymiz...
Sizning salomatligingiz uchun barcha chora-tadbirlarni amalga oshiramiz. Dori-darmonlar bilan zarur holatda ta’minlaymiz, barcha murojaatlaringizga javob beramiz. Biz tomonimizdan ko‘rilayotgan barcha choralar, olib borilayotgan ishlar faqatgina siz bilan birgalikdagi harakat natijasida ijobiy samara beradi, deb o‘ylaymiz. Sizdan iltimos karantin qoidalariga to‘liq rioya qiling”, — dedi u o‘z murojaatida.
Olmazor tumanining ishonch telefonlari:
(97) 101-20-34, (99) 111-42-07, (99) 914-02-01, (93) 515-72-24, (90) 371-92-00, (99) 898-15-01, (95) 200-12-21, (97) 741-14-16, (98) 305-02-35, (99) 828-94-27.
Uchtepa tumani hokimi Farhod Abdullayev ham tuman ahlidan uzr so‘rab, tuman rahbariyati 24 soatlik ish vaqtiga o‘tganini ma’lum qildi.
“Avvalambor biz sektor rahbarlari xalqimizdan uzr so‘raymiz. Kasallikka kurashish borasida ma’lum bir vaqt davomida xotirjamlikka berilish sababli kasallik soni oshib ketdi. Muhtaram yurtboshimizning 15-iyul kuni o‘tkazilgan videoselektoridan keyin biz sektor rahbarlari ish uslubimizni o‘zgartirdik. Xususan, 24 soatlik ish vaqtiga o‘tdik”, — dedi u.
Farhod Abdullayev tumandagi tibbiyot muassasalaridagi sharoit va holatni ma’lum qilgach, yana bir bor tun-u kun aholi murojaatlarini eshitishga tayyor ekanini eslatdi.
“Biz 4 ta sektor hamda mas’ul rahbarlar 24 soatlik ish vaqtdamiz va ekrandagi telefon raqamlari orqali bog‘lanishingiz mumkin. Fuqarolarimizning murojaatlarini 24 soat davomida qabul qilamiz va zudlik bilan ijobiy hal qilamiz”, — dedi tuman hokimi.
Uchtepa tumanining ishonch telefonlari:
(98) 335-31-16, (99) 030-07-38, (99) 997-26-10, (97) 707-78-03, (94) 678-22-76, (93) 528-04-97, (99) 049-99-03, (97) 412-07-18, (98) 367-94-88, (99) 986-23-46.
Chilonzor tumani hokimi Sarvar Mahametov ham tumanda kuzatilgan o‘lim holatlari uchun odamlardan kechirim so‘radi.
“Tumanimizda kasallikka chalinganlar va vafot etganlar bor. Buning uchun o‘zim va jamoamiz nomidan uzr so‘rayman. Bunga ishni to‘g‘ri tashkil qilmaganimiz sabab bo‘lgan. Tumanimizda 8 ta oilaviy poliklinika bor va qo‘shimcha yana bitta klinika tashkil qildik. Bundan tashqari, tumanimizdagi xususiy klinikalarda ham koronavirusdan davolanish uchun sharoit yaratildi.
Hurmatli chilonzorliklar, hozir vahimaga tushmasligimiz muhim. Belgilangan tartiblarga amal qilsak, koronavirusni yengamiz. Ekranda ko‘rsatilgan telefon raqamlariga istalgan vaqtda qo‘ng‘iroq qiling. Bu sektor rahbarlarining shaxsiy telefon raqamlari. Poliklinika yoki kasalxona tomonidan sizga yordam berilmasa, bizga murojaat qiling. Bir tan-u, bir jon bo‘lib harakat qilsak, shu vabodan qutulamiz”, — dedi Chilonzor hokimi.
Chilonzor tumanining ishonch raqamlari:
(98) 306-27-00; (98) 351-14-10; (99) 849-07-65; (93) 523-89-78; (99) 898-18-17; (99) 484-39-16; (98) 142-07-04; (97) 157-77-66; (98) 142-07-20; (90) 320-00-53.
Bektemir tuman hokimi Shohrux Mamajonov hududda tashkil etilgan 4 ta mobil guruh 4 ta shtabga biriktirilganini aytdi.
“Avvalo koronavirus pandemiyasi kirib kelgani uchun sizlardan uzr so‘raymiz. Tumanimizda ayni damgacha 164 kishi virus yuqtirgan. Ulardan 131 nafari uy sharoitida, 33 nafari tibbiyot birlashmalarida davolanmoqda. Hurmatli fuqarolar, sizlardan karantin cheklovlariga amal qilishingizni iltimos qilamiz.
Tumanimizda tashkil etilgan shtabda 4 ta mobil guruh tashkil etilgan va ular 4 ta sektorga biriktirilgan. Tuman shtabidagi telefonlar 24 soat ishlamoqda. Tumanimiz aholisidan shifokorlar bilan birga kurashishni so‘rab qolamiz”, — degan Bektemir hokimi.
Bektemir tumani ishonch telefonlari:
(98) 335-88-84; (98) 367-10-80; (99) 883-33-55; (99) 858-43-71; (98) 365-56-65; (93) 572-16-13; (93) 502-00-02; (98) 126-17-79; (97) 778-85-06; (99) 872-76-77.
Mirobod tuman hokimi Shuhrat Po‘latov hududdagi uchta kasalxonada virus yuqtirganlarni davolash uchun 260 ta joy tayyorlanganini aytdi.
“Pandemiya boshlangandan buyon Mirobod tumani hokimligi tomonidan ko‘p ish qilindi, ammo bu ishlar yetarli bo‘lmagani ko‘rinib turibdi. Buning uchun sizlardan kechirim so‘raymiz. Tuman markaziy poliklinikasida Call-markaz tashkil etilgan. U yerda malakali shifokorlar guruhi ishlamoqda. Bundan tashqari, tumandagi 4 ta oilaviy poliklinikada ikkitadan mobil guruh kecha-yu kunduz ishlamoqda. Bu guruhlar tumandagi uylarga borib o‘zini yomon his qilayotgan bemorlarga yordam berishyapti.
Tumanda COVID-19 yuqtirganlarni davolash uchun uchta kasalxonada joylar tashkil etilgan. Xususan, respublika klinik shifoxonasida 100 ta o‘rin, respublika teri-tanosil shifoxonasida 60 ta o‘rin va shahar klinik shifoxonasida 100 ta o‘rin. Kechadan boshlab 5-teri-tanosil klinikasida COVID-19 poliklinikasi tashkil etilgan. U yerda odamlardan koronavirusga test olinmoqda, shuningdek, rentgen apparati ham qo‘yilgan.
Mirobod tumanida 140 ming kishi yashaydi va ulardan 248 nafari zararlangan. 120 kishi tuzalib chiqqan. Hozirda uy sharoitida 54 nafar, shifoxonada 68 nafar bemor davolanyapti. Tumanimizda kasallarni davolashda muammo yo‘q, sizdan faqat karantinga amal qilishingizni so‘raymiz”, — degan Mirobod hokimi.
Mirobod tumani ishonch telefonlari:
(98) 308-25-43; (98) 121-11-37; (99) 030-07-34; (99) 889-45-78; (97) 422-11-05; (99) 899-38-88; (97) 490-45-01; (90) 119-01-07; (99) 831-01-64; (90) 909 43-32.
Shayxontohur tuman hokimi Abduqahhor To‘xtayev va tuman mutasaddilari ham koronavirus tarqalishi yuzasidan aholisiga murojaat qildi.
To‘xtayevning ma’lum qilishicha, tumandagi “Yoshlik” sport arenasida 564 o‘rinli shifoxona tayyorlanyapti. Keyingi haftada ishga tushadi.
Shuningdek, bugun Shayxontohur tumanida kasallikka chalinganlar soni 600 nafardan oshiq. Ulardan 200 dan oshig‘i tuzalib chiqqan. 200 nafari kasalxonalarda, 210 nafari uy sharoitida davolanmoqda.
Murojaat uchun telefon raqamlari:
(90) 956-46-60, (98) 812-85-00, (98) 302-26-66, (94) 673-31-33, (71) 241-71-22, (71) 241-31-49, (71) 241-17-42, (71) 241-21-71, (71) 241-18-92, (71) 241-80-89
Yashnobod tuman hokimi Hojiakbar Tillashayxovning ma’lum qilishicha, bugungi kunda tumanda 7 ta oilaviy poliklinika tun-u kun faoliyat olib bormoqda. Bundan tashqari, tuman hokimligida 1076 qisqa raqami orqali maslahat markazi tashkil etilgan.
Tuman hokimi o‘z murojaatida aholidan sarosimaga tushmaslikni, o‘zlarida kasallik alomatlarini sezishsa, shifokorlarga murojaat qilib ularning maslahatlari bilan harakatlanishlarini so‘radi.
Murojaat uchun telefon raqamlar:
(98) 368-17-09, (99) 030-07-43, (98) 360-71-01, (98) 307-60-87, (98) 331-24-00, (90) 997-70-00, (90) 972-57-38, (99) 017-07-05, (90) 931 26-59, (99) 444-64-46
Yakkasaroy tuman hokimi o‘rinbosari Sherzod Taslimov va tumandagi mutasaddi rahbarlar koronavirus keskin tarqalib ketgani uchun tuman aholisidan uzr so‘radi.
“Bugun tumanimizdagi barcha poliklinikalar tun-u kun ishlash tartibiga o‘tdi. Ular kerakli dori-darmon va mashinalar bilan ta’minlagan. Sizlardan sarosimaga tushmaslikka hamda karantin qoidalariga amal qilishlaringni so‘rab qolar edim. Agar biz birlashsak, bu kasallikni, albatta, yengib o‘tamiz”, — dedi u o‘z murojaatida.
Murojaat uchun telefon raqamlari:
(98) 301-77-70, (97) 707-85-09, (98) 127-17-18, (90) 354-00-60, (93) 536-97-24, (90) 316-64-94.
Ma’lumot uchun, O‘zbekistonda 24-iyul soat 10:00 holatiga ko‘ra, koronavirus infeksiyasi qayd etilganlar soni yana 118 kishiga ko‘payib, kasallikka chalinganlarning umumiy soni 18 986 nafarga yetdi. Yangi kasallanish holatlarining 64 nafari Toshkent shahrida qayd etildi. Mamlakatda umumiy hisobda COVID-19 bemorlarining 10 149 nafari (53 foiz) sog‘aygan. SSV taqdim etib kelayotgan statistika bo‘yicha mamlakatda epidemiya boshlanganidan buyon 103 kishi vafot etgan. “Daryo” hisobi bo‘yicha esa koronavirusdan vafot etganlar soni 108 nafarni tashkil etmoqda.
Izoh (0)