Buxoro shahrida 24-iyul, juma kuni yangi qurilayotgan ko‘p qavatli uylarning kanalizatsiya quvurlarini shaharning asosiy kanalizatsiya tizimiga ulash ishlarini olib borayotgan uch nafar ishchi kanalizatsiyadan chiqayotgan gazdan zaharlanib vafot etdi, yana bir nafar ishchi kasalxonaga tushdi. Bu haqda Ichki ishlar vazirligi huzuridagi Tergov departamenti xabar berdi.
Ma’lum qilinishicha, 24-iyul kuni, taxminan, soat 11:00 da “Buxoro maxsus suv qurilish” MChJ xodimlari Buxoro shahar Jomiy ko‘chasida joylashgan yangi qurilayotgan ko‘p qavatli uylarning kanalizatsiya quvurlarini shaharning asosiy kanalizatsiya tizimiga ulash ishlarini olib borgan.
Ulash ishlarida qatnashayotgan 47 yoshli A.K. va 45 yoshli S.B. quvurlarni montaj qilish jarayonida kanalizatsiyadan chiqayotgan gazlardan zaharlanishi oqibatida sog‘lig‘ining yomonlashganligi sababli hushidan ketgan. Shu sababli ularning sherigi 27 yoshli Z.Sh. ularga yordam berish maqsadida kanalizatsiya quvuriga tushgan, biroq u ham kanalizatsiyadan chiqayotgan gazlardan zaharlanib hushidan ketgan.
Voqeaga guvoh bo‘lgan yana bir ishchi, 41 yoshli S.A. yordam berish maqsadida ushbu quvurga tushib, zaharlanishdan hushidan ketgan. Atrofda to‘plangan aholi tomonidan faqatgina S.A. qutqarib qolingan. Uning sheriklari — 47 yoshli A.K., 45 yoshli S.B. va 27 yoshli Z.Sh. esa hodisa joyida kanalizatsiyadan chiqayotgan gazlardan zaharlanib vafot etgan. Fuqaro S.A. kasalxonaga yotqizilgan.
Ta’kidlanishicha, hodisa joyiga tergov guruhi chiqib, voqea joyini ko‘zdan kechirib, tergovoldi surishtiruv harakatlarini olib bormoqda.
Avvalroq Toshkentda yog‘och olib chiqish uchun 6 metrli oqova suv qudug‘iga tushgan ikki kishi havo yetishmasligi sababli quduqdan chiqa olmagan. Ular favqulodda vaziyatlar xodimlari tomonidan qutqarib olingan.
Izoh (0)