Buxoro viloyatining Olot tumanida yashovchi fuqaro o‘z xonadonida noqonuniy o‘q-dori va qurol-aslaha saqlab kelayotgani aniqlangan. Bu haqda “Daryo”ga xabar bergan viloyat bojxona boshqarmasi matbuot xizmatining yozishicha, yashirin sir xizmat iti tomonidan fosh qilingan.
Ta’kidlanishicha, 2020-yilning 17-iyul kuni Buxoro viloyati bojxona boshqarmasi kontrabandaga qarshi kurashish va bojxona auditi bo‘limi hamda DXX viloyat boshqarmasi xodimlari bilan hamkorlikda Olot tumanida tezkor tadbir o‘tkazilgan.
Tadbir davomida barcha aholi xonadonlari qatori tumandagi “Kirlishon” mahallasida yashovchi fuqaro B.Q.dan ham dala shiyponida noqonuniy ashyolar bor yoki yo‘qligi so‘ralgan. U o‘zida va dala shiyponida hech qanday noqonuniy ashyolar yo‘qligini ma’lum qilgan. Biroq tadbirga jalb etilgan “Olot” chegara bojxona posti kichik inspektor kinologi F.Ravshanovga tegishli “Qora” laqabli xizmat iti bezovtaligi xodimlarda shubha uyg‘otgan.
Xolislar ishtirokida uning dala shiyponi yon atrofi ko‘zdan kechirilganda ariqning yon tomonida gavjum o‘sgan o‘simliklar orasiga oq rangli polietilen qop yashirib qo‘yilgani aniqlangan. Qopda ikki stvolli 12 kalibrli, stvol raqami A64118, qo‘ndoq raqami A30675 bo‘lgan “IJ-17” rusumli ov quroli va 1 dona 16x73 raqamli gilza borligi fosh etilgan.
Shuningdek, B.Q.ning shiyponi ko‘zdan kechirilganda og‘irligi 8 gramm bo‘lgan porox va 1 dona 16x73 raqamli gilza hamda taxminan 150 gramm qo‘rg‘oshin bo‘laklari ham topilgan. Ular holatga oydinlik kiritilgunga qadar vaqtincha saqlovga olingan.
Hozirda mazkur ish yuzasidan surishtiruv olib borilmoqda.
Izoh (0)